Sisimiuni qimussimik sukkaniutileqaat

Avannaata Qimussersuanut arfininngorpat marsip aappaani nal. 13.00 anngunniuttoqassaaq. Qimussit aallarfissaat apuuffissaallu aqqusinertaarsuup kangiatungaani qimmeqarfiup kingulliup eqqaaniissaaq. Avannaata Qimussersua nunatsinni qimussimik sukkaniunnerit anginersaraat.
Allattoq Peter Troelsen, Simon Uldum
februaarip 20-at 2013 10:37

Sisimiuni Sømandshjemmimi pingasunngornermi februaarip 27-iani paasissutissiilluni ataatsimiisitsisoqassaaq. Ilaatigut ingerlaarnermut malittarisassat tassani paasissutissiissutigineqassallutik. Aammattaaq sukkaniuteqataasussat tulleriinnissaat makitsinikkut aalajangersarneqassaaq. Ullormili sukkaniuffissami aallarfissaq akunnerup affaanik sioqqullugu anngunniunnissamut peqataaniarluni nalunaartoqarsinnaavoq.

Qimussimik sukkaniuttoqarneranut atatillugu qimussersut allat qamuterattullu sukkaniuttunik akornusersueqqunagit qinnuigineqarput, Qerrortusup Majorianut utimullu ingerlaartoqassaaq. Isiginnaarianut aamma sammisassaqartitsisoqarlunilu kissartutugassanik tuniniaasoqarumaarpoq. Aaqqissuisut taamaasillutik ulloq nuannernerulersissallugu neriuutigaat.

Unnukkut nal. 19.00-mit 01.00-mut Tuapannguanut festsaliani qititsisoqassaaq.

Qimussimik sukkaniunnermut malittarisassat uani atuarneqarsinnaapput: http://www.qimusseq.org/upl/website/--vedtgter-vddelb1/VddelbsreglerGRDA120301.pdf

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq