Sisimiuni qimmit pingasut naalliutsillugit toqunneqarsimapput

Qimminik naalliutsitsisarneq kingumut saqqummeqqippoq, tassami Sermitsiap aqagu saqqummertussap saqqaani assitaavoq qimminnguakkuluk naalliutsinneqarluni toqunneqarsimasoq, qimmeq aassuarmik ulikkaartoq.

Qimmit pingasut naalliutsinneqarlutik toqunneqarsimasut Sisimiuni nassaarineqarsimapput. Qimmit qiminneqarsimapput, niaqqumikkullu anaartarneqarsimangaaramik ammaannartunik ikilertiterujussuarsimallutik.

Qimmit toqungasut pingasut taakku Sisimiuni sumiiffinni assigiinngitsuni pingasuni nassaarineqarput. Kingulleq blok 15-ip Aqqartarfimmiittup eqqaani containerimi timersortartut taskiata iluaniittoq nassaarineqarpoq.

Taamaammallu Sisimiuni inuttaasut takunnissimasinnaasut politiit qinnuigaat, inummik inunnilluunniit timersortartut taskiannik nassartumik takunnissimagunik Sisimiuni politiinut saaffiginneqqullugit. Taski taanna tungujortumik, qaqortumik aappaluttumillu qalipaatilinnik ilisarnaateqarpoq, ” saneqqamigullu Grønlandsfly”-mik allanneqarluni.

Sisimiuni politiit oqarasuaataat normoqarpoq 86 42 22.