Sisimiuni qimmit pillugit atsiornernik katersisut
Sisimiuni qimmeqarfik nutaarluinnaq upernaaq atuutilerpoq. Tamannalu qimmilinnut ajornartorsiortitsivoq.
- Serlersaarisut annertunerulerput, soorlu qimminik naalliutsitsinerit taava aamma biilinik sukkasuumik ingerlalluni qimmiaqqanik aporseriasaartarnerit qimmiaqqallu uiartorneqartut amerlatsipput, Sisimiuni qimmilik atsiornernillu katerseqataasoq Navarana Lennert oqarpoq.
AAMMA ATUARUK Kalaallit qimmii pillugit atuakkiortoq
Inuit 38-t missaanniittut maanna qimmeqarfimmiititaqartut, taassuma oqaatigaa.
Qimmeqarfittaarlu illoqarfiup avataani ungasiartumi heliportitoqqap eqqaaniimmat qimmilinnut pisarissersuutaasaqaaq.
- Qimmeqarfiit kommunermiuninngaanniit illoqarfiup avataanut inissinneqarnikuugamik ulloq unnuarlu imaaliallaannaq alakkarneqarsinnaajunnaarlutik.
Qimmeqarfik ajornannginnerusumik nakkutigisinnaajumallugu assiliissutikkut nakkutilliissutilersikkusukkitsik, Navarana Lennert oqarpoq.
AAMMA ATUARUK Qimussertarneq tammatsaaliorniaraat
Kommunillu qimmeqarfimmik nakkutilliisalernissaa anguniarlugu atsiornernik katersipput.
150-it missaanniittut maanna katersoreersimalerpaat, taakkulu kommunalbestyrelsimut sapaatip akunnerata tulliani tunniutissavaat. Assiliissutikkummi nakkutilliissuteqalerpat qimminik naalliutsitsisut ilaatigut naammattoorsinnaalissavaat.
- Immiussutilersortinnissaa kissaatiginaraluaqaaq, sutigut tamatigut toqqissisimatitsisinnaassagami, Sisimiuni qimmilik atsiornernillu katerseqataasoq Navarana Lennert oqarpoq.