Sisimiuni qimarnguik "Oqqiffik" oktobarip allaqqaataani matuneqartoq aningaasassaaleqineq pissutigalugu ammaqqinneqassanngitsoq, qimarnguiup siulittaasua Regine Enoksen oqarpoq.
Namminersornerullutik Oqartussat Sisimiut Kommuniallu katillugit 260.000 koruuninik qimarnguimmut aningaasaliisarput. Qimarnguik pillugu Sisimiut Kommuniat N.O.-nut innersuusisimanngimmat 100.000 kr.-it amigaatigineqalersimapput, kommunillu aningaasaliissutai naanmmanngimmata qimarnguik ammaqqissinnaangilaq.
Qimarnguiup naatsorsuutini Sisimiut Kommunianut ukiut tamaasa tunniuttarpai. Qimarnguimmut tapiissutit sulisumut ataatsimut, pigaartartunut, illullu ingerlanneranut atorneqartarput.
Ukiut tamaasa arnat 200-t 400-llu akornanniittut qimarnuimmut saaffiginnittarput, amerlasuutigut meerartaqarlutik. Qimarnguik marluunnarnik sinittarfeqarmat, amerlasuut unnuisinnaasanngitsut, Regine Enoksen oqaluttuarpoq.