Sisimiuni qamuteralammik ajutoortoq
Sisimiuni politiit sapaatip akunnerata naanerani ulapissimapput, arfininngornerup ualikkuani angut snescooterertilluni ajutoormat.
Snescooterimik aquttoq naatsorsuinerliornermigut ingerlaannartoorsimavoq, taamaasilluni ammut 200 meterinik nakkarsimalluni. Angut nakkariartornermini sikumut ujaqqamullu aportarsimavoq,
Niaquarnaveeqqusersimagallartillunilu annappoq.
Qulimiguulimmilli Nuuliaanneqartariaqarsimavoq, Dronning Ingridip Napparsimmavissuani peruluttut inaaliaanneqarluni.
Politeeqarfiit annerit pingasut nalunaarput sapaatip akunnerata naanera eqqissisimaarfiusimasoq.
Ilulissani ataasiakkaanik angerlarsimaffinni eqqissiviilliortoqarsimalluni.
Qaqortumi pinartumik pisoqarsimanngilaq, aserorterisoqarsimanera eqqaassanngikkaanni.
Nuummi politiit oqarput nalinginnaasumik suliassaqarsimallutik. Eqqissiviilliornerit ataasiakkat aalakoortullu siumorneqarsimapput.