Sisimiuni politiit amerlineqarnissaat pisariaqartinneqartoq
Tillinniaqattaarneq, persuttaanerillu sukkanerusumik akiorneqassappatta Sisimiuni politiit amerlanerusut pisariaqartinneqarput.
Politiit 2025-mi ukiumoortumik nalunaarutaanni inatsimmik unioqqutitsilluni pinerlunnerit nalunaarutigineqartut 26 procentimik amerleriarsimasut saqqummersinneqareersorlu kisitsisit saqqummertut amerlallutillu alianartut.
Qeqqata kommuniani kommunalbestyrelsi tusagassiuutinut nalunaarummini allappoq.
Politiillu suliaminnut angummatissappata nunatsinni amerlineqartariaqarnerat inatsisit atuutsinneqarnerannut naalakkersuisup piumasaqarnera, Qeqqata Kommuniani kommunalbestyrelsemit isumaqatigineqarpoq.
Ilanngaaserisut aamma pisariaqartinneqartut
Sisimiuni politiinik amigaateqartoqarnerata saniatigut ilanngaaserisunik aamma amigaateqartoqarpoq.
Qeqqata Kommuniani ikiaroornartup arsaarinnissutigineqartartup annikippallaarnera pissutigalugu ikiaroornartup Qeqqata Kommuniani ajornartorsiutaannginnerani Naalakkersuisut isumaqarsimappata tamanna eqqarsaatigeqqinneqartariaqartoq
Kommunalbestyrelsemi ilaasortat isumaqarput.
Umiarsuit aqqutigalugit ikiaroornartumik eqqussinerit siornatigut naammattoorneqartartut pissutigalugit, umiarsualiviit aamma nakkutigineqartariaqartut kommunalbestyrelsemi ilaasortat isumaqarput.
Meeqqat inuusuttullu siunissami ileqqorissaarnissaat anguniarlugu Sisimiuni innuttaasut namminneerlutik aamma iliuuseqartariaqartut angerlarsimaffimminnilu ataqqeqatiginneq pingaartinnerusariaqaraat kommunalbestyrelsemit kaammattuutigineqarpoq.
Qeqqata Kommunia tusagassiuutinut taama nalunaaruteqarpoq.
