Sisimiuni pisoqqat sassaqqipput

Borgmester Hermann Berthelsen (S) Agathe Fontainilu (IA) Sisimiuni kommunlabestyrelsimut qinigassanngorteqqittunut ilaapput. Nutaanut ilaagujoq Demokraatit siulittaasuata tullia Palle Christiansen.

Siumup Sisimiuni kommunalbestyrelsimut qinigassanngortitai katillugit 14-iupput. Partii kommunalbestyrelsimi amerlanerussuteqarpoq inissat 13-iusut affaat sinnerlugit, tassa 7-t ilaasortalugit, taamalu amerlatigisut iserteqqinniarneqassappata qinigassaqarluartariaqarpoq. Ullumikkut ilaasortaasut ataaseq kisimi pinnani qinigassanngorteqqipput. Taakkununnga ilaapput borgmesteri Hermann berthelsen, borgmesterip tullersortaa Marius Olsen kiisalu Sisimiut Tusaataanni aallakaatitassiortoq Aqqa Peter Lyberth. Inger Eriksen qinigassanngorteqqinngilaq. Siumup sassartitaanut nutaanut ilaapput Kangerlussuarmi nunaqarfiup aqutsisuini siulittaasoq Fritz Baumann kiisalu Morten Siegstad.

Inuit Ataqatigiit 8-nik sassartitaqarput, kommunalbestyrelsimilu massakkut ilaasortaasut pingasut ilaat marluk sassaqqimmata, borgmesterimut tullersortit aappaat, Agathe Fontain kiisalu Kathrine Lennert Larsen. Aanissi Svane JOhansen qinigassanngorteqqinngilaq. IA-p sassartitaanut ilaavoq Sisimiuni immikkoortortaqarfiup pisortaa Olga B.Ljungdahl.

Atassut Sisimiuni 11-nik qinigassanngortitaqarpoq, kommunalbestyrelsimilu ilaasortat pingasuusut ilaat marluk sassaqqipput, tassaasut Richard Absalonsen Atassutillu Sisimiuni siulittaasua Emilie Olsen. Inatsisartuni ilaasortaq Godmand Rasmussen qinigassanngorteqqinngilaq, sassartunulli nutaanut ilaavoq Innarluutillit Kattuffianni siulittasoq Mette Sofie Lerch.

Demokraatit 8-nik qinigassanngortitsipput, taakkunannga ilisimaneqarnersaalluni inatsisartuni ilaasortaq partiimilu siulittaasup tullia Palle Christiansen. Taasuma saniatigut qsassartut ilagaat politeeq Christina Johnsen, Erik Lomholdt-Beck aamma Kurt Voldstrup Holm.

Sisimiut kommunalbestyrelsiannut attaviitsunik kisimiillutilluunniit qinigassanngortittoqanngilaq.