- Aatsaavissuaq taamaattunik naammattoorsivugut uagut maani. Allanik naammattuugaqarnikuunngilagut taamaattunik, Gûstâvarak’ Berthelsen talerperleq oqarpoq.Assi: KNR / Ole PL Petersen

Sisimiuni piniartut qilalugartat qaqortat qimaannakkat pillugit: Aatsaavissuaq taamaattunik naammattoorsivugut

Sisimiuni ukiorpassuarni piniartut qilalugartat mattaaginnariarlugit qimaannarneqarsimanerata kingunerisinnaasai annilaangatigaat.

- Sisimiut Maniitsullu eqqaani qilalukkanik mattaaginnariarlugit qimatsisimaneq pissuserissaarnerunngilaq unioqqutitsinerullunilu.

Taama erseqqitsisigumik Piniarnermut Naalakkersuisoqarfik ippassaq nalunaaruteqarpoq, qilalukkat qaqortat mattaaginnarlugit qimanneqartarsimasut naalakkersuisoqarfimmut ilisimatitsissutigineqareersorlu.

Ukiorpassuarni piniartuusut pisanik mattaaginnakkanik qimatsisoqartarsimanera aamma tujormissutigaat.

Piniartut Gerth Olsen aamma Gûstâvarak’ Berthelsen ukiorpassuarni piniartuupput. Qilalugarniartartuugamik qilalukkat mattaaginnariarlugit sinneri qimanneqarsimasut arajutsisimanngilaat.

- Uagut tamanna atugarinngilluinnarlugulu naammattoorsisarnikuunngilagut, Gerth Olsen oqarpoq.

- Aatsaavissuaq taamaattunik naammattoorsivugut uagut maani. Allanik naammattuugaqarnikuunngilagut taamaattunik, Gûstâvarak’ Berthelsen oqarpoq.

Piffissami kingullermi qilalugarniallattaagamik pisanik mattaaginnakkanik qimatsisimaneq tujormissutigaat.

- Avaanngunartutut uanga assut tiguara, assut quiaginngilluinnaqqissaarpara taamaattoqarsimanera, Gerth Olsen oqarpoq.  

- Akuersaarneqarsinnaanngillat taamaattut, uagut maanngaanniik akuersaanngilluarluaasaratsigit piaartumik ataatsimiissutigaagut eqqartorlugit, Gûstâvarak’ Berthelsen oqarpoq.

Nunarsuatsinni arfanniartarneq arfattassiisarnerlu eqqumaffigineqartorujussuusarmata, piniartunut kingunerlussinnaanera aamma piniartut nalunngilluarpaat.

- Nalunngilagut nunarsuarmioqatigut tamakkulerisut qanoq tappitsigisut, tassa eqqugaariaannaagatta maani Sisimiuni aamma uagut, qanoq ilisumik, annilaanngatigaarput tamanna, Gûstâvarak’ Berthelsen oqarpoq. 

- Piniagassat killeqartigisut taamak uagutsinnut kingunerlorujussuariaannaammat, taamak pisassat ikitsigisut maani Qeqqata Kommuniani, Gerth Olsen oqarpoq.

Kingunerisinnaasaat ataatsimiissutigigaat

Qilalukkanik mattaaginnariarlugit qimatsisoqartassappat, qilalugarniartartunut kingunerlutsinneqarsinnaanera ernummatigigamikku, piniartut saniatigooralugulu piniartut peqatigiiffimminni ataatsimiissutigaat.

 

Assi: KNR / Ole PL Petersen.

 

- Tamakkua ilanngullugit eqqartorpagut, uagutsinnut kinguneqarsinnaavoq ajortorujussuarmik ukiuni tulliuttuni taamatut pisoqartassappat.

- Aamma kissaatigaarput, maani eqqatsinni piniariartartorpassuanngormata qimagaasoqarnaaveersaarnissaa, kusananngilaq, Knud Mølgaard oqarpoq.

Maniitsumi aalisartut piniartullu peqatigiit tusagassiutinut nalunaarput, qilalukkanik mattaaginnariarlugit qimatsisimaneq ajuusaarutigigitsik akuerinagulu, piniakkallu suulluunniit eqqarsaatigalugit atorluaasoqartalernissaa sulissutigineqartariaqartoq allapput.

Neqaasa tuniuminaatsissinnaanerat peqqutaaqataava, imaluunniit peqqutaasoq?

- Peqqutaaqataasinnaavoq taanna. Kisianni uagut maani qimmeqarfimmiuugatta qimmilinnut iluatigisarpagut susinnaanngikkaangatsigit, Knud Mølgaard oqarpoq. 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat