Sisimiuni oqaluffitoqqap iluarsartuunnissaanut aningaasaateqarfik tunissuteqartoq

Sisimiut Katersugaasiviat Den A.P. Møllerske Støttefondimit 1.730.000 koruuninik tunissuteqarfigineqarpoq. Aningaasat oqaluffitoqqap Berthelip oqaluffiata eqqissisitap iluata iluarsartuunnissaanut atoneqassapput. Suliniut katillugit 2.615.000 koruuninik naleqassaaq.

Oqaluffitoqqap ilua siornatigut isikkumisut 1700-kkornisarpalaartumik ilusilerneqassaaq.

Iluarsartuunneqareerpat oqaluffitoqaq Sisimiut Katersugaasivianut atanermigut saqqummersitanut kulturikkullu aaqqissuussinernut atulissaaq. Iluarsartuunnissaanut pilersaarut Center for Bygningsbevaring Raadvadimiittup suliaraa.

- Aningaasaliisussanik qinerlertigata Unnuk Kulturisiorfimmi iluarsartuussinissamut pilersaarut innuttaasunut saqqummiupparput. Taamani assut pissangavunga inuit sukarsuit iikkallu tungujortut aappalaartullu takugunikkit qanoq qisuariassanersut. Aasaq kingulleq iikkat 1700-jukkunni tungujortuullutillu aappalaartuusut aatsaat paasivarput. Qujanartumilli inuit pilersaarut nuannareqaat. Assut ersarippoq oqaluffitoqaq Sisimiormiut uummataanni inissaqarluarmat. Inuimmi aamma ukiorpassuit oqaluffitoqqap atuuffeqannginnera ajuusaarutigaat. Illoqarfiummiuna tulluusimaarutaa, Sisimiut Katersugaasiviata ningiua Christine Løventoft taama oqarpoq.

 

1775 sananeqarlunilu atoqqaartinneqarpoq

Oqaluffitoqaq Nunatsinni oqaluffiit pisoqaanerit kusanarnerpaallu ilagaat. Siulliullunimi kalaallit namminneq piumassutsiminnik oqaluffiliaraat, nappartanik 60-inik arferup orsuinik imalinnik akilerlugu. Oqaluffitoqaq qisunnik qaleriissaakkanik sanaajuvoq, qisuillu qaleriissaariaannanngukkat Københavnimit umiarsuakkut nassiunneqarput, 1775-imilu katiterneqarnermini naammassineqarluni.

1926-imi oqaluffitoqaq atuarfinngortinneqarpoq, kingornalu apersortittussat palasimoortarfiattut atulerluni. 2003-mi oqaluffitoqqap silataa isikkutoqqamisungajak isikkoqaleqqippoq, iluanili iluarsartuussineq unittoorluni. Taamaammat kiffiuteqanngilaq, kiassarneqarani, iikkanilu qilaamilu putoqarluni. Unammillernarnersaraat aaqqiissutissamik ujartuineq. Tassa iikkat 1700-meersut piuinnartinnissai, saniatigut kiffiarlugu kiassarlugulu suliarinissaa unammillernarpoq. Taamaammat Katersugaasivik 2014-imi Center for Bygninsbevaringimut attaveqarpoq.

Oqaluffitoqaq illoqarfiup qiterisimasaani toqqammaveqarpoq. Ullumikkut illoqarfiup immikkoortortaa Sisimiuni katersugaasiveqarfiuvoq. Katersugaasiviup illoqarfiup oqaluttuarisaanera saqqummersitaraa, Qeqqata Kommuniata ataani inissisimalluni, ukiumullu inunnik 5000-inik iserneqartarluni. 2015-imi Kangerlussuup Katersugaasivialu kattunneqarput. Kangerlussuarmi Katersugaasivik sorsunnerup nillertup timmisartoqarnerullu oqaluttuarisaanera saqqummersitaraa.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat