Sisimiuni nunaminertaq isertitsiviliornissamut atorneqarsinnaanngorpoq

Sisimiut kommunalbestyrelseata ullumi ataatsimiinnermini akueraa, nunaminertap Sisimiut akianiittup ilaata pinerluuteqarsimasut inissinneqartarfissaannut ammasumut atorneqarneqarnissaa. Innuttaasut 165-it akerliunerat taamaalilluni tusaaniarneqarsimanngilaq.

Aalajangerneq sioqqullugu innuttaasut akerliullutik atsiortiteraluarput. Atsiornernik katersueqataasoq Vivian Møller Johansen pakatsivoq.

-Soorunami pakatsinngitsoorfiunngilaq, assut oqallitsitsineq perusunnikuugaluaratsigu, kissaatigalugulu kinguartikkumaaraat, taavalu aatsaat inuiaqatigiit aalajangiiffigissagaat.

Vivian Møller Johansen aamma oqarpoq nunaminertaq pineqartoq illoqarfiup akerpiaaniittoq pisuttuarfiusarmat ernumassutissaqartoq. Borgmesterili Hermann Berthelsen eqqissisaavoq oqarluni innuttaasut ersissutissaqanngitsut.

-Kommunalbestyrelse tamarmiusoq isumaqarpoq ersissutigineqartut assigiinngitsut ersissutigineqartariaqanngitsut. Minnerunngitsumik assersuutigiinnarlugu massakkut illoqarfimmi angalaarput inuit arlallit taamatut isertitsivimmut utaqqisuusut. Taamaammat pitsaanerpaajuvoq utaqqisut isertitsivinnut isertikkaanni taava nakkutigineqarnerat taamaalilluni pitsaanerussaaq. Taamaammat kommunalbestyrelse tamarmiusoq isumaqarpoq tunngavilersuutigineqartut ersissuteqarnermik tunngavillit tunngavissaqanngitsut. Borgmester Hermann Berthelsen taama oqarpoq. Erseqqissaatigaa maanna aalajangerneq nunaminertap atorneqarnissaanut tunngasuinnaammat, sulilu nalunartoq pinerluutiteqarsimasut qulit 20-illuunniit inissaat qaqugu naammassissanersoq.

Akerliusunik inunnik 18-ileereersunik 165-inik atsiortitsisut illoqarfiulluunniit iluani isertitsiviliornissaq eqqarsaatigisariaqarsoraat, illoqarfiup akianiunngitsoq.

-Uagut isumaqaratta illoqarfit anginerit katersuuffiuallaartut pinerluuteqarsimasunut. Tulluartissinnaagaluarparput illoqarfinni mikinerusuniikkaluarpata, immaqa kajuminnarnerusutut tikissallugit pinerluuteqarnissaq taamaasilluni kajuminnaannerulissagaluarpoq.

Vivian Møller Johansen aamma oqarpoq, maanna nalugitsik qanoq-ilioqqissinnaanerlutik.