Sisimiuni nuna sajuttoq

Sisimiuni nuna ulloqeqqata siunilaanngua sivikitsukullammik, tusarfiilli naapertorlugit, sakkortuumik sajuppoq. Sekundit marlussuit ingerlaneranni sajuppilorujussuarpoq, inuillu tupaqqaqisut silamut aniasimapput.

- Nalunaaqutaq ulloqeqqanut tanneq arfineq-pingasut qaangilaaraa tamanna pivoq. Bilit eqqaaniitillunga qanngorpallammik tassanngaannaq tusarpunga, isumaqarlunga entreprenørilluunniit qaartitsisut. Inuit tupassimaqaat igalaakkullu itsuartorlutik, Sisimiuni politiit pigaartuat Farta Olsen oqaluttuarpoq.

Nunap sajunnera tupannarsimavoq, pigaartorli oqarpoq nuna sajoqqissimanngitsoq, ajoqusertoqarsimanngilarlu.

Sisimiuni nuna sajummat nunatsinni ukioq-manna aappassaa taama nalaataqarpugut. Qeqertarsuarmi ukioq marsip ulluisa 30-ianni nuna aamma sajuppoq, Richterip uuttuutaa malillugu 4,5-imik sakkortussusilimmik.

Qeqertarsuarmi nunap sajunnera GEUS-imit, tassa Nunatta Danmarkillu nunalerineq pillugu misissuisitsisarfianit annikitsuinnartut nalilerneqarpoq.