Sisimiuni nipilersornermik festivali nutaaq
Festivalimi ukiut tamaasa pisartussatut sulissutigineqartussami nipilersortartut taalliortut erinniortullu Nunanit Avannarlerneersut peqataasassapput. Sisimiunilu sapaatip akunnerani ataatsimi pikkorissarnermi peqataasassallutik.
Festivalimi ukiut tamaasa ulluni pingasuni nipilersorfinnit assigiinngitsunit pingasunit nipilersornermik tusarnaartitseqattaartoqartarnissaa eqqarsaataavoq. Nipilersortartut ilisimaneqareersut nutaallu nipilersoriaatsinik assigiinngitsorpassuarnik tusarnaartitsisassapput.
Nipilersortartut ukiormanna festivalertitsinermi siullermi tusarnaartitsisussat tassapput - Simon Lynge taanna CD-mik nutaamik saqqummersitseqqammerpoq - nipilersortartut ukiorpassuanngortuni ilisimaneqartut G-60 aamma nipilersortartut Århus-imeersut Small Time Giants aamma Inuit Feet.
Tamatuma saniatigut festivalimi peqataasut illoqarfimmi meeqqanut akeqanngitsumik tusarnaartitsisassapput, aammalu timersortarfimmi akisunngitsumik tusarnaartitsisoqartassalluni, illoqarfimmi sumiiffinni assigiinngitsuni nipilersortoqartassalluni, nunaqarfinnullu qaninnernut tusarnaartitsiartortoqartassalluni.
Festivali sioqqullugu pikkorissarnerit nipilersornermik aallutalinnut eqeersaataassaaq. Erinarsuusiortartut nunatsinneersut, Nunani Avannarlerneersunik inuussutissarsiutigalugu tamakkuninnga suliaqartunik peqateqarlutik sammisaqaqatigiittassapput. Pikkorissaanermi nipilersortartut nutaanik taalliorlutillu erinniornermik saniatigut, Nunani Avannarlerni nipilersornermik aallussisunik attaveqarluarnermikkut Nunani Avannnarlerni nipilersornerup silarsuaani nutaanik periarfissaqalernissaat anguniagaavoq.
