Sisimiuni napparsimmavik Lyngep misissuiffigaa

Nappasimmavinni sulisut innuttaasunut pitsaanerusumik paasissutissiisarnissaat aamma nakorsartittarnerit Nunatsinni suut periarfissaanersut paasissutissiissutigineqartarnissaat, Qeqqata Kommuniani kommunalbestyrelsemut ilaasortap, Evelyn Frederiksenip Facebooki aqqutigalugu atsiornernik katersivoq.

Sisimiut napparsimmavianni pitsaavallaanngitsumik innuttaasut sullinneqartarsimallutik, Facebookikkut allattut amerlalluinnarsimasut, Evelyn Fredriksenip oqaluttuaraa.

Soorlu arlaannik sapigaqartut sullinneqarnerat pitsaavallaarsimanngitsoq, Evelyn Fredriksenip assersuutitut taallugu.

Tassalu tamannarpiaq Evelyn Fredriksenip, Peqqissutsimut Naalakkersuisumut Steen Lyngemut allaaseraa akissuteqarnissaanillu qinnuvigalugu. Steen Lyngelu tamassumunnga akissuteqarpoq, oqarluni Nunatsinni arlaatigut sapigallit pillugit ilisimasat ullumikkut suli annikittuinnaaneri isertuunneqarsinnaanngitsoq.

Taamaattumik ilisimasat annertusineqarnissaat Evelyn Frederiksen neriuutigaa.

- Soorunami soqutigisariaqarparput arlaatigut sapigallit sooq amerliartuinnavinnersut, tassalu tamassuma ilisimaneqalernissaa pingaaruteqarpoq, Evelyn Frederiksen taama oqarpoq.

Nunatsinni meeqqat sapigaqartut ukiuni kingullerni qulini amerliartorsimaneri kisitsisitigut takuneqarsinnaavoq tassa taakku marloriaatinngorsimallutik.