Sisimiuni misissuisarfimmik pilersitsisoqassasoq

Qeqqata Kommuniata Sisimiuni peqqinnissaqarfik suleqatigalugit misissuisarfik aallartinniarpaat.
- Tullinnguuppoq sumiissanersoq inuit qassit atorfissaqassanersut taavalu qitiusoqarfimmiit piumasaqaatit taakkua naammassinissaannut uagut qanoq iliuuseqassanersugut, Juliane Henningsen oqarpoq. Assi © : RitzauScanpix
aggustip 05-at 2021 12:51
Nutserisoq Connie Fontain

Sisimiuni misissuisarfeqalissaaq.

Qeqqata Kommuniani pisortaaneq, Juliane Henningsen naapertorlugu kommunip Sisimiuni peqqinnissaqarfik ikiorlugu misissuisarfimmik pilersitsinissaq neqeroorutigaa.

- Suleqataasinnaanermut soqutiginnillutik akissuteqaqqammerput. Taamaattumik nuannaarutigaarput tigulluarneqarmat taamatut neqeroornerput, pisortaaneq oqarpoq.

AAMMA ATUARUK Naalakkersuisoq misissortikkusuttunut: Naammagittartariaqarpusi

- Taava tullinnguuppoq sumiissanersoq inuit qassit atorfissaqassanersut taavalu qitiusoqarfimmiit piumasaqaatit taakkua naammassinissaannut uagut qanoq iliuuseqassanersugut, Juliane Henningsen oqarpoq.

"Ilungersornartorujussuuvoq!"

Sisimiormiut aperigaanni Sisimiuni covid-19-imut misissortinniarluni napparsimmavimmut attaveqarniarnerup ajornakusoornera pissutigalugu misissuisarfimmik peqalernissaa amigaataavoq.

Vivian Møller Johansen peqalernissaanik kissaateqartut ilagaat. Taanna napparsimmavimmut iluatsitsinani - 77-eriarluni ippassaq sianerpoq.

Taanna naggussaminik anniarpoq, niaqorluppoq kakkilertallunilu taamaammat coronamut misissortikkusuppoq. Sisimiunimi tunillatsissimasut nutaat sisamat marlunngormat paasineqarnerani tuniluuttoqartoq paasineqarpoq.

Vivianip misissortinnissaminut inniminniiniarluni sianeqattaarnini kiisami iluatsikkamiuk nalunaaqutaq ataatsinut sianeqqinnissaminik oqarfigineqaannarpoq.

- Nuummi ullut tamaasa ammasartumik misissuisarfeqarpoq, inuit tassunga takkutiinnarsinnaapput. Soorunami Sisimiuni taamaattoqanngitsoq? Maani oqarasuaatikkut iluatsitsiniarluta ilungersortarpugut. Misissuisarnerup ilusilersugaalluarnerunissaa kissaatigaara, taanna oqarpoq.

Qeqqata Kommuniani tunillatsittut amerliartortut

Kissaatigisaalu taanna maanna tusarneqarpoq.

Misissuisarfik qaqugu ammassanersoq suli aalajangerneqanngilaq.

Nunatsinni tunillatsissimasut katillugit 63-iupput. Tunillatsissimasut juulip aallartinneranilli amerliartuinnarput. Nunatsinni coronamik siorna marsimi tunillatsissimasoqaqqaaneraniilli taama amerlatigisimanngillat.

AAMMA ATUARUK Vivian Sisimiuni napparsimmavimmut iluatsinngitsumik 77-eriarluni sianertoq

Nakorsaaneqarfiup nittartagaa naapertorlugu Qeqqata Kommuniani Avannaata Kommunialu tunillatsissimasut nutaat amerlanerupput.

Qeqqata Kommuniani Sisimuni tuniluuttoqarfiusumi tunillatsissimasut ippassaq sisamaapput. Taakku ullumikkut aqqaniliupput.