Sisimiuni meerannguit imaanut nakkartut annaakkaat
Sisimiuni nukappiarannguit marlulissat pingasunik ukiullit, ippassaq imaanut nakkarsimapput ipigaluarlutillu. Qujanartumilli aalisartut marluk sissamiitillutik sukkasoorujussuarmik iliuuseqajaarmata meerannguit taakku annaanneqarput, massakkullu ajoratik napparsimmavimmiit angerlareersimallutik. Meerannguanik annaassisut aalisartut marluk tassaapput Aslak Jensen aamma Karsten Lings.
Annaassiniarnertik iluatsilluartoq Aslak Jensenip ima oqaluttuaraa:
- Ippassaq sissami Karstenip umiatsiaa ullukkut orsersorlutigu aallarteruttortugut, sissap qulaaniit suaartartoqarpalulerami, meerannguinngooq ikaartarfiup eqqaani naakarsimasut. Aapparma angallataata eqqaani pitoqqagatsigu umiatsiaq Nuummit 150 hestekraftilinnik motorilik, qujanartumik sukkasooq. Immitsinnut qiviaratta oqaaseqaratalu pissikkatta umiatsiaaqqamut, ingerlaannarlu sukkalisaarluta taakunga oqaatigisaata tungaanut alakkerteripallalluta. Taakkunga piartorluta ingerlaannaq takusaqarsinnaannginnatta- malunnartoqannginnami. Kisianni inuit nunamiittut naliminnut ussersoramik, taamaariarmat takkunnarluta, takuleratsigit imaani qernertuarannguanik marlunnik nuisasoqartoq, taavaana sikup ataanut pulaliivissut. Sarfarnikkaalaartorsuugami. Asuliinnaq taakku tikiserlugit takuleriallaratsigit attallaannguit. Ataatsikkut tigugatsigit, nusullugit qaqillugit pileriallarpagut meerannguit marluk- nukappiarannguit marlulissat- taava ipisimallutik nukeeruttut. Umiatsiamut innartikkatsigit – taamatut qaqitsilluni iliuusissaarunnartorujussuuvoq, nammineq meeraqarluni nukillaajummernarami. Kisianni nammineq immaqa misilittagaqalaarnerput tunngavigalugu uummarsaalluta aallartikkatta. Aapparisara uummarsaalaariarluni NATO-stillingimut inissiinnariarlugu tulakkiartupallalluni aallarsarami. Uanga aqqutaa tamaat aappanngua uummarsarakku uummataatigut tagiartorlugu tarajorlu qarngatigut milluttarlugu. Taava tulaviilluta uummartikkakku- qamuuna nukkassutigingaakkannik- uanga nammineq tusaagukku anersaartorpaluttoq sallaatsuaraarannguamik. Taamalisoq Karstenip aappanngua tigoriarlugu niugami arpallunilu qummut aallarluni. Biilini uummaarsaraat takugaluapara arpallunga politiit biiliinut ikigama napparsimmavimmut apuuttugullu, kinguninngua aappanngua aamma qujanartumik uummartissimallugu napparsimmavimmut eqquppaat.
