Sisimiuni meeqqanut inuusuttunullu ornittagaq ammaanersiornissaminut qaaqqusisoq

Sisimiuni Meeqqat Toqqissillutik Ornittagaat (MTO) sapaammi oktobarip 26-ani ammassaaq.

Tassunga atatillugu MTO illoqarfimmi innuttaasut tamakkerlugit ammaanersiornissamut qaaqquai. 

Ammaanersiornermi – kaagit saftit kaffillu saniatigut – aliikkusersuisoqassaaq aamma borgmesteri Malik Berthelsen (S) Meeqqat pillugit oqaaseqartartoq Stina Sværd oqalugiassapput.

Ornittagaq Qeqqata Kommunia, Kalaallit Nunaanni inissiaatileqatigiiffik INI, suliniut Meeqqat oqartussaaqataanerat aamma peqatigiiffik Østifterne suleqatigalugit pilersinneqarpoq.

Meeqqat Toqqissillutik Ornittagaat tassaavoq illu ornittagaq, pisariaqartinneqartunik, soorlu isumaginninnermi, nerisaqarnermi toqqissisimanermilu ikorfartuiffiunissaa siunertaasoq, INI-p nittartagaani allaqqavoq.

Tamanna ilutigalugu ornittagaassaaq nuannisarfiusinnaasoq:

- Taakku saniatigut siunissaq isigalugu sammisassat, soorlu ilinniagassanik ikiuineq, oqaatsinik ilinniarneq, nutaanik pilersitsilluni sammisaqarneq, pinngortitami kulturikkullu misigisassat allallu meeqqat naliliinerat naapertorlugu pisariaqartut, annertuumik ukkanneqassapput.

Tamakku tamarmik ammaanersiornermi oktobarip 26-ani nalunaaqutaq 15 tusarneqarnerusinaapput. Qaaqqusissut ornittakkap facebookikkut quppernerani nassaarineqarsinnaavoq.

- Innuttaasut peqatigalugit nalliuttorsiornissarput qilanaareqaarput, neriuppugullu Sisimiuni meeqqanut inuusuttunullu ornittakkap nutaap ammaanersiornerani peqataasoqarluarumaartoq, MTO-p tusagassiutinut nalunaartuaani allaqqavoq.