Saarulliit qanoq soorlu toqorarsimanerat suli ilisimaneqanngilaq.Assi: Susanne Berthelsen

Sisimiuni Maniitsumilu saarullippassuit uumatitsivinni toqungasut

Royal Greenlandip saarulliit toqorarsimasut misissuleruttorpai. Aalisartut Royal Greenland pisuutippaat, Royal Greenlandillu sermip aannera pissutaanerarlugu.

Sisimiuni Maniitsumi aalisartut arlallit saarulliit tonsit arlallit annaavaat.

Saarulliit qassuni uumatitsivinniittut bundgarniniittullu pineqarput, uumatitsiviit aalisartut Royal Greenlandimit atugaraat. Saarulliillu tonsit arlallit maanna toqorarsimapput. Saarulliit toqorarsimasut qanoq amerlatigeqqissaarnerat suli ilisimaneqanngilaq.

Saarulliit qanoq soorlu toqorarsimanerat suli ilisimaneqanngilaq, Royal Greenlandilli tamanna Maniitsumiit kangerluliartitsineratigut maanna misissorluarneqaleruttorpoq.

Saarullit toqungasut

Mogens Fontain Sisimiuni aalisartuuvoq, taassumalu kina aalisakkat toqorarnerannut pisuunersoq qularutiginngilaa:

- Royal Greenlandip malittarisassai malillugit immiivugut, imatut pisoqartarpoq: Aalisagaq uumasitsivimmut ikissavarput, taava ulikkaarpat nalunaarutigissavarput. Nalunaarutigineraniik ullut qulit 14-nillu iluanni imaariartorneqarnissaat naatsorsuutigigatsigut. Kisianni maanna uumatitsiviup nalunaarutigineraniit qaammat sinnerlugu qaangiuttorlu uanga toqusoorpunga.

Sisimiunit aalisartup allap, Nuka Olsenip saarulliit sivisuallaartumik uumatitsivimmiissimasorai.

- Utaqqinerujussuaq, saarulliit perlernerat immaqalu immap allanngornera pissutaapput. Paasiuminaappoq assut.

Nammineq akisussaaffiginngilisiuk uummatinniarnissaat?

- Royalip piumasaat malillugit suliarivagut, neriseqqusaanngilagut, immiinnartussaavagut, allamik naamik. Tassa piumasaat malillugit suliarigaluarpagut.

Taassuma uumatitsivik 30 tonsit tikillugit imaqarsinnaasoq nassuiaatigaa.

Uumatitsivinnit aqqanilinnit aqqaneq marlunniittuni saarulliit toqungasut nassaarineqarput.Taassuma uumatitsiviutimini saarulliit qanoq amerlatigisut toqorsimanerat apeqqutaalluni 100.000 koruunit missaannik tamanna annaasaqaatigisimassallugu nammineq naatsorsorpaa.

Royal Greenland: Sermip aannera saarulliit toqoraatigigaat

Royal Greenlandip tusagassiuutitigut nalunaaruteqarnermini aalisartut arfinillit Maniitsumeersorlu ataaseq saarullinnik uumatitsivinni toqorartunik naammattuuisimanerarpai.

Royal Greenlandip pisoq nalinginnaannginnerarpaa saarulliillu perlerneranik pissuteqarsinnaanera ilimanannginnerarlugu.

- Periuseq aalisarnermi misilittarluaqqaarneqarnikuuvoq, saarulliillu sapaatip-akunnerini arlalinni nerisaqaratik uumasinnaapput. Tamanna aalisakkat toqorarsimanerannut peqqutaanngitsoq qularinngilarput. Saarulliit toqorarsimanerat nunami sermip aanneranik peqquteqarsinnaavoq, imaluunniit saarulliit bundgarniniit qassutinut uumatitsivinnut nuunneqarnerini periuseq atorneqartoq peqqutaasinnaavoq.

Royal Greenlandimi saarullinnik saattuanillu tunisassiornermut ingerlatsinermik aqutsisoq, Sten Sørensen oqarpoq.

Qassutit uumatitsiviit nunamiit sermip aaffianut iigartartumulluunniit qanippallaartumut inissinneqarsimanerat, taamaalillunilu immap qaavata imermik tarajoqanngitsumik akoqarpallaalernera saarulliit toqorarsimanerannut peqqutaasinnaavoq. Tamanna saarullinnut sunniuteqartarpoq. 

Kilisaammik allamik atuilersoq

Royal Greenlandip attaveqaqatigiinnermut pisortaata, Masaana Egedep aalisartut amerlanerusut saarullinniarnermi qassunik bundgarninillu uumatitsivinnik ukioq manna atugartut nassuiaatigaa. Umiarsuarli ataasiinnaq atorlugu saarullippassuit aaneqartarput. Taamaammat aalisakkerivissuaq kilisaammik allamik aamma atuilerpoq.

- Ukiuni kingullerni aalisariuseq uumasitsivinnik atuineq aalisartut amerliartortut atugarilerpaat, taamalilluni aamma pisat amerlatsinnikuullutik. Ukioq manna malugivarput amerlatsinnikuunerat taava angumeriniarsaralugu ukua angusarnissaat. Sapaatip akunnera tulliani kilisaat alla tikittussaavoq ikiuiartorluni, Masaana Egede oqarpoq. 

- Sulissutigivarput sukkanerusumik aasarnissaat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat