Sisimiuni Kulturip Illussaa atertaarpoq

”Taseralik” Kalaallit Nunaanni tusallattaaqqilissagipput qularnanngilaq. Taseralik Sisimiut eqqaani Nassuttuup paavaniittoq qangarsuarniilli aasiartorfigineqartarsimavoq, sineriassuatsinnit isorartoqisumit ukiorpassuarni ornigarneqartarsimasoq. Sisimiuni Kulturip Illua aamma taamatut taguuteqalissaaq.
novembarip 15-at 2007 05:55

Unammisitsinermi ateq Taseralik siunnersuutigineqartunut ilaavoq, inunnit assigiinngitsunit pingasunit siunnersuutigineqarsimalluni. Sisimiuni Kulturip Illua ukiortaap kinguninngua atoqqaartinneqarpat Taseralimmik atsiinissamut siunnersuuteqartut tamarmik immikkut 2.000 koruuninik akissarsitinneqassapput.

Kulturip Illuata atissarsiuunneqarneranut atatillugu unammisitsinermi naliliisut Taseralik tulluuttutut isigalugu ajugaatippaat, qanga Taseralimmi aasisoqaranngat pilisoqartarmat, assigiinngitsunik paarlaasseqatigiiffiusarmat, inngerfiusarmat assigiinngitsutigullu aliikkusersoqatigiiffiusarluni. Naatsumik oqaatigalugu ateq Taseralik toqqarneqarpoq kulturip illuani, aasinermi pisartut ilaat ingerlanneqartartussaammata. Kulturip Illuata pisortaa, Juaaka Lyberth, oqarpoq, Kulturip Illuata ilisarnaatissaa tulliullugu unammissutigitinneqassamaartoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq