Sisimiuni kulturikkut illussaq suliariumannittussarsiuunneqarpoq

Sisimiuni innuttaasut aappaagu kulturikkut illutaarnissartik takorluulereersinnaavat, Sisimiut kommuniami maanna kulturhusissap sananeqarnissaanut suliariumannittussarsiuussilerpoq.

Pilersaarutit malillugit kulturikkut illussaq maajip 17-ani sanallugu aallartinneqassaaq aappagulu augustip 15-ani naammassineqarnissaa pilersaarutigineqartoq, Sisimiut kommuneani sanaartornernermut pisortaq Niels Nielsen ilisimatitsivoq. Kulturikkut illu sananeqaruni inuit 250-it isersimaffigisinnaasaannut naammattumik inersuartaqassaaq, filmerfiusinnaallunilu tusarnaartitsiviusinnaassalluni. Aamma Café-qassaaq, pingasunillu minnerumaartunik ineeraqassaaq, cafémut atalersinnaasumik, pikkorissartunit oqalugiartunilluunniit atorneqarsinnaanissaa periarfissaassalluni.

Sisimiut TV-a aamma inissamik pissarsisimavoq, sanaartorneq naammasseriarpat nutseriaannanngorlutik. Illoqarfimmi lokalradio aamma inimik neqeroorfigineqarsimagaluarpoq, naaggaarsimappulli maannakkut inissisimmavitsik illoqarfimmi naammagisimaaramikku.

Sisimiuni kulturikkut illuliassaq 1100 kvadratmeterisut angissuseqassaaq, sananeralu 20 mio. koruuneqassalluni, Sanatilu tamatumunnga pilersaarusiortuuvoq.