Sisimiuni kulturhusimut 450.000 kr.-nit

Sisimiuni kulturikkut illorsuaq ilimagisamit akisuneruleqqissaaq. Sisimiuni kommunalbestyrelsip aqagu ataatsimiinnermini immikkut aningaasaliissutissatut 450.000 koruunit kulturikkut illorsualiamut atugassat akuersissutigissavai.

Kulturikkut illorsuup missingersuusiornerani betoni ukiukkut sanaartornermi atorneqarsinnaasoq naatsorsuutinut ilanngunneqarsimanngilaq siusinnerusukkullu illorsualiortoqarnissaa pissutigalugu immikkut aningaasaliisoqartariaqalersimavoq. Taamaattumik 450.000 koruunit ukioq manna kommunip karsianit tiguneqassasut borgmester Hermann Berthelsen oqarpoq. Immikkut aningaasaliisoqarnissaanik innersuussut tamanit tapersersorneqarmat akunerineqarnissaa borgmesterip ilimaginerarpaa.

Taamaalilluni kulturikkut illorsualiap aningaasartuutai amerlineqaqqissapput. Aasaq kommunalbestyrelsi immikkut ittumik 10 million koruunit missaannik aningaasaliisariaqarsimavoq illorsualiornissaq aallartinneqarsinnaaniassammat.

Immikkut aningaasaliisoqarnissaa utaqqimaarneqarmat sanaartorneq kinguartuussaaq. Kulturikkut illorsuaq 2007-imi naammassineqartussatut ilimagineqartoq katillugit 32 million koruuninik maanna akeqassagatinneqarpoq.