Sisimiuni kiassarneq pillugu akiligassinneqarsimasut akerliupput

Sisimiuni ineqartut 300-t sinneqartut ullumi akerliussutsiminnik takutitsipput. Namminersornerullutik Oqartussat inissiaataanni ineqartut kiassarnermut akiliutinik ilaatigut qaammammusiatik nungullugit Inissiaatileqatigiiffik INI A/S-imit qaammat naammat ilaanngaanneqarsimapput.
Allattoq Najaaraq Egede
apriilip 07-at 2008 17:24

- Sisimiuni ineqartut akerliussutsimik takutitsinerat ullumi nalunaaqutaq ataatsimut ingerlanneqarpoq, ineqartut siulersuisuisa aaqqissugaannik.

Kommunip allaffiata ataatungaaninngaanniit tissaluttuliaminngaanniit aqqusinikkut ingerlaarneqarpoq INI A/S-ip qullersaqarfiata silataanut, tassanilu oqalugiarnerit assigiinngitsut ingerlanneqarlutik. Ilanngutassiortoq Alibak Augustussen ualiartoq taama oqarpoq.

Oqaatsit ilaatigut sakkortuginartut aninneqarput.

Inatsisartut ineqarnermut ataatsimiititaliaata siulittaasuata (Godmann Rasmussen) akerliussutsimik takutitsisunut erseqqissarpaa naammagittaalliuutinik tigusaqartarsimalluni.

- Oqaluttuaraa ineqartut ilaat aningaasarsiffimmik nalaani pisiniarfinni pisiniarlutik, tassani aningaasarsiffimmi kontortik immerneqartussaammat, paasisarsimagaat kontortik imaqanngitsoq.

Alibak Augustussen oqarpoq arlallit kingusiinnakkut aatsaat paasisarsimagaat sunaaffa INI A/S-iminngaanniit aningaasarsiat tamakkerlugit ineqarnermi kiassarnermut tapiutissanut akiliutigitinneqarsimasut.

- Ineqartut ilaat qaammammusiaminnit 6.000 koruunit angullugit tapertussanngorsimapput.

Naalakkersuisut siulittaasuat Hans Enoksen akerliussutsimik takutsitsisunut neriorsuutigaa, pissutsit paasiuminaatsut iluarsisariaqartullu allat aaqqinniarneqarneranni nammineq siuttuujumalluni.

- Tamatumunnga aamma atatillugu neriorsuutigaa siornatigut ingerlasimasoq IPK (Ineqartut Peqatigiiffiisa Kattuffiat) pilerseqqinneqarniarnissaa anguniarlugu nalunaaqutaq pingasut qeqqa ineqartut siulersuisui ataatsimeeqatiseralugit neqeroorfigai, Alibak Augustussen Sisimiunit oqarpoq.

Naalakkersuisut siulittaasuat Hans Enoksen ataatsimiinnermi neriorsuivoq ineqartut kattuffiata pilerseqqinneqarnissaanut naalakkersuisuninngaanniit suleqataajumaarlutik pinngitsoorneqarsinnaanngimmat. Ineqarfinni kiassarnermut naatsorsuutit INI A/S-imit aamma kukkunersiorneqalerput.