Sisimiuni innuttaasut USA-mi qinersineq pillugu: Trump tissinarnikooqaaq Biden silatusaarpasippoq
USA-mi qinersisoqareernerata kingorna Sisimiuni aqqusinertigut inuit naapitat nuannaarlutillu neriuuteqarput. Joe Biden nunami pissaanilissuarmi præsidentinngortussanngorpoq Donald Trumpilu Præsidentip illorsuaniikkunnaassaaq.
Tage Lennertilli Bidenip ukiui 77-iisut tupigusuutigaa.
- Tupinnaqaaq taamak utoqqaatigisut amerikami qinigassanngortittarmata. Soorunami nukissaqarsimagami taamaassimavoq, inuit sananeqaataat taannaannaagaluarpoq, kisianni neriuppunga soorunami alloriartitsiumaartoq, Tage Lennert oqarpoq.
Kamala Harrin Joe Bidenimut tullersortaassaaq taannalu USA-mi simertumik amilinni arnani siulliussaalluni præsidentimut tullersortaassaaq.
- Taanna arnaq visepræsidentissaa tutsiviginartorujussuuvoq, taanna oqarpoq.
Trump inussiarnernerulaarsimagaluaruni qinersinermi ajugaasimasinnaagaluartoq, Tage Lennert naliliivoq.
- Taama tukatsigisumik saqqummertarnera pillugu massakkut ajorsarnera assut eqqissiallaatigaara.
Jens Peter Berthelsenip USA-mi præsidentip taarserneqartussanngornera aamma nuannaarutigaa.
- Ajorinngilara, inuiaat taama amerlatigisut taama ittumik siuttoqarnerat tupigiuaannarnikuugakku, ajoriffissaqartinngilara, Jens Peter Berthelsen oqarpoq.
- Tassami neriuuteqarfigaara, ullutsinni inuusoqarsinnaannginnami nunarsuarmioqatigiit isumaqatigiissutaat tamaasa tunullugit, sualummik naalagaaffeqatigiit taamak annertutigisut, Trumpip pissaaneqarnerata nalaani suna tamaat qimarratigisutut innikuummassuk, taanna oqarpoq.
Elmar Grothip Joe Biden aamma isumaqataaffigaa, tunuarsimaarneruvorli.
- Biden ajugaammat ajorinngilara. Kisianni, repræsentanternes husimi suli amerlanerussuteqalinngilaq, suli naammassineqannginnamik. Aamma Senatimi suli naligiippasittorujussuupput, Elmar Groth oqarpoq.
Trump USA-llu nunatsinnut soqutiginninneranut atatillugu Elmar Grothip Joe Biden silatusaarnerusumik iliuuseqartassasoraa.
- Nunarput qiviarutsigu, neriuppunga silatusaartumik oqaloqatigiissitsissasoq, ameriikkamiummi Nunatsinnut qanoq atassuteqartiginissaat apeqqummi matumani pineqarpoq. Nunatsinnut qanilliartorput, tamanna Trumpip siorna augustip 20-anni malugitippaa Kalaallit Nunaat pisiarinialillarmagu.
Trump USA-p præsidentiatut qanoq ippa?
- Ingasattajaartuuvoq! Kamappasittoq, sugaluartarnerporlu. Politikeriunngilaq, paasisinnaanngilarpummi. Tv-ikkut nuigaangat tv patikkusuummernartarpoq nillertumik kissaammertitsisarami, annilaajumisaarnartaqaarmi, Elmar Groth oqarpoq.
Niels-Ole Ugpernángitsup Donald Trump præsidentitut aamma nuannaartorivallaanngilaa.
- Ash, tissinarnikooqaaq, ingammik Nunarput pisiariniarmagu illariarnikooqaanga
- Isumaqanngitsutut nalunaartarnera, soorlu ungaannaq isigisutut erseqqippallaartarami, Jens Peter Berthelsen oqarpoq.