Sisimiuni innaallagiap akia appassaaq

Malik Berthelsenimut Siumumeersoq Sisimiuni innaallagissiorfiup aningaasaqarneranut tunngassuteqartuni arlalinnik apeqquteqarsimavoq. Ilaatigut paasiumasimavaa innaallagissiorfiup qaqugu Sisimiuni atuisuniit akilerneqassanersoq. Ineqarnermut Attaveqarnermullu Nalakkersuisoq Jens B. Frederiksen ilisimatitsivoq aningaasartuutit assigiinngitsut arlaqartut suussusaat paasiniarneqartoq.

Nukissiorfiit Nunatta Karsianut ukiuni 20-ni ernialerlugit taarsersugassanik attartornikuuvoq.

Erngup nukinga atorlugu nukissiorfimmi nalikillilerinissaq, nukissiorfiup qanoq sivisutigisumik piusinnaaneranit eqqoriaanerit aallaavigalugit aalajangersarneqarsimapput. Assersuutigalugit turbinerit generatorillu nalikillerneqarsinnaapput ukiut 35-t qaangiunnerini, nukissiorfimmulli sullorsualiaq aatsaat ukiut 60-it qaangiunnerani nalikillerneqarsinnaavoq.

Malik Berthelsenip aamma paaserusussimavaa nukissiorfiup inatsisit naapertorlugit kommunimit tiguneqarnissaa periaarfissaanersoq. Soorlu Jens B. Frederiksenip maluginiarsimagaa nukissiorfiup sananeqarnera 480 millionit koruuninik akeqarsimasoq.

Kommunip nukissiorfimmik tigusisinnaanera inatsisitigut akornutissaqanngilaq. Nukissiorfiit innaallagissamik pilersuinissamut imaluunnit innaallagissiorfimmik pigisaqarnissamut aamma piginnaatitaanngillat. Aammalumi kommunip tiguseratarsinnaanera Namminersorlutik Oqartussat suliassaqarfiinik allatuulli tigusinermi malittarisassat naapertorlugit ingerlanneqartussaasoq, Jens B. Frederiksenimit naqissuserneqarpoq.