Sisimiuni imeq suli qalatsinneqartassaaq
Tamatuma kingunerisaanik imeqarfimmit toqqaanartumik imertartarnissaq kaammattuutigineqanngilaq. Imeq tassanngaaneersoq salinneqarneq ajorpoq, tamatumalu kingunerisaanik bakteeriaqarnerulluni taamaasillunilu napparsimalernissamut aarlerinartoqarnerulluni.
Sisimiuni Nukissiorfiit imermik pilersuinermi atortut tamaasa misissuleruttorpaat. Taamaaliortoqarneratigut imermi bakteeriat annikillisinneqareerput, taamaakkaluartorli killiussat aalajangersarneqarsimasut qaangerlugit suli bakteeriaqarluni.
Sapaatip akunnerani uani imermik misissugassamik tigusisoqaqqissaaq. Misissueqqissaarnerit inerneri pissarsiarineqarsimaleriarpata uummasut nakorsaanut immikkoortortaqarfimmit erngup qalateqqaartarnissaanik inassutip atorunnaarsinneqarsinnaannera pillugu ilisimatitsissuteqartoqassaaq.
Mingutsitsinermut pissutaasoq
Imeq bakteeriamik Clostridium perfringens-imik mingutsinneqarsimavoq – bakteeria pinngoriartortartoq nalinginnaasumillu issumi annanilu nassaasaasartoq. Bakteeria tamakkiisumik mingutsitsinermit aallaaveqarpoq, taamaattumillu napparsimalissutaasinnaasunik soorlu virus-imik miluuttunillu ilutigalugu akoqarsinnaalluni. Kingulliullugu taaneqartoq misissoriminaatsorujussuuvoq taamaattoqarsinnaanerali mattusimaneqarani.
Bakteeriat, virusit miluuttullu imip qalasinneqarneratigut toqusarput, kisiannili bakteerissat Clostridium perfringens-imit pinngorartut kissartumut akiuussinnaasorujussuupput qalatinneqarnermikkullu toqusinneqarsinnaasaratik. Taamaattumik erngup eqqortumik qalasinneqarlunilu nillasarneqartarnissaa pingaaruteqarpoq.
Imeq 100 graderinngorlugu minutsini marlunni qalasinneqassaaq.
Qalatitsivik innaallagiatortoq atorneqartillugu imeq marloriarlugu qalasinneqartassaaq siullermik qalasinneraniit 2-5 minutsit uninngateriarlugu qalateqqillugu.
Kaffemaskiinat atorneqarsinnaanngillat, imeq tassuuna qalasinneqarneq ajormat.
Imeq nillasarlugu imigassaq imaluunniit naatsitanik saliinermi atugassaq qalasinneqareernermi kingorna sukkanerpaamik nillasarneqassaaq nillataartitsivimmut/qerititsivimmut ilillugu, bakteeriat nutaat pinngoraqqilersinnaannerat pinngitsoortinniarlugu. Periuseq taana atorneqassaattaaq imeq atorlugu nerisassiornermi, nerisassallu ullup tullianut nerineqartussanngorlugit toqqorneqassatil-lugit.
