Sisimiuni imeq bakteriaqarmat qalaateqqaaqquneqarpoq

Sisimiuni erngup naliginnaasumik misissorneqarnerani illoqarfiup immikkoortortaani Qajaasani, bakterissanik novemberip sisamaanni nassaartoqarpoq.
Allattoq Bikki P. Kleist
novembarip 10-at 2009 08:11

Taamaammat Qajaasani, Sisimiuniittumi innuttaasut erngup iminnginnerani qalaateqqaartaqqullugu innersuunneqarput.

Erngup qalaateqqaarnissaanik Upernavimmi, Ikerasammi Uummannap eqqaaniittumi kiisalu Eqalugaarsunni Qaqortup eqqaaniittumi siusinnerusukkut innersuussineq atuutiinnarneqartoq aamma nalunaarutigineqarpoq.

Taamaammat Upernavimmi, Ikerasammi, Eqalugaarsunnilu innuttaasut erngup iminnginnerani qalaateqqaartarnissaanik aamma innersuunneqarput.

Nukissiorfiit piaarnerpaamik imeqarfimmi erngullu aqqutaani bakteriaajaaniarput. Bakteriaajaaneq naammassippat erngup bakteriaqassusia misissorneqaqqissaaq.

Misissuinerit nutaat inerneri tiguneqarpata Uumasunut nakorsaaneqarfiup nalunaarutigiumaarpaa, imermik qalaassisarnissamik innersuussut attatiinnarneqassanersoq.