Sisimiuni heliportitoqaq ammaqqinniarneqarpoq

Sisimiuni mittarfiup nutaap, 799 meterinik mittarfittallip, ammarneqarnerata kingorna, heliportitoqqap, 1998-imi atorunnaartup, ammaqqinneqarnissaa kommunip kissaatigaa, tamanna Qeqqata Kommuniata nittartagaani atuarneqarsinnaavoq.

Inuussutissarsiuteqartunit amigaatigineqartartut, taamalu angallassisartut namminersortut, takornarianik qulimiguulinnik ilaatigut timmisartuussisarnissaat periarfissinniarlugu kommunip kissaateqarnera pilersaaruteqarnermut tunngaviuvoq. Heliportiusimasoq siunertamut tamatumunnga naleqqulluinnartuussasoq Kommunalbestyrelsi naliliivoq.

Taamaattumik siunnersuut maanna tamanut tusarniaassutigineqalerpoq, aammalu siunnersuummut oqaaseqaatit akerliliinissallu kingusinnerpaamik septembarip ulluisa arfineq-aappaanni tigujumaneqarlutik.

Heliportip atorunnaarnerata kingorna inuusuttut aliannaarsaartarfiattut ukioq 2000-imiilli atorneqarpoq, ilaatigut ungdomsklubbeqarfittut, saarlisaartarfittut, sannaveqarfittut nipilersornermillu sungiusarfittut.

Illuutit qanittukkut aamma allineqarput.

Init inuusuttunut atugassat qanoq pineqassanersut tamanut tusarniaanermut kommunip nassuiaataani allassimanngillat.

Nunap ilaa, ullumikkut ungdomsklubbeqarfittut atorneqartoq, nutaamik siunnersuuteqarnikkut heliportinngorteqqinneqassaaq.