VIDEO Sisimiuni GUX-imi ilinniartut piviusulersaarusiorput

Sisimiuni GUX-imi ilinniartut piviusulersaarutiliartik "Kalaallit Nunaata Siunissaa" naammassivaat.
Allattoq Ivik Kristiansen
apriilip 22-at 2016 11:00

- Kalaallit Nunaata Siunissaa immiupparput, tamanit ammasumik eqqartugaalernissaa anguniarlugu, piviusulersaarusioqataasoq, Kaaleeraq Møller Andersen KNR-imut oqarpoq.

Piviusulersaarummi Inatsisartunut ilaasortat, Naalakkersuisut, eqqumiitsuliortut, inuussutissarsiornermi nuimasut, oqallissaarisullu Nunatta siunissaanut takorluugaat saqqummiunneqassapput.

GUX-imi ilinniartut ilinniakkaminnut atatillugu piviusulersaarusiornerat aallartippoq.

- GU-rnitsinni nunarsuarmioqataanermik sammisaqarpugut. Kisianni una qaammat kingullerli killeqarpoq. Kisianni suleqatikka marluk ilagalugit piviusulersaarusiaq ingerlatilerparput. Ilimagisatsinniillu anginerujussuanngorpoq, Kaaleeraq Møller Andersen oqarpoq

Siunissarpullu qanoq isikkoqassanersoq assigiinngitsunik takorloorneqarpoq. Politikerit namminersulivinnissarput ilaatigut qularinngilaat. Inuusuttulli qularnerupput.

Piviusulersaarut Taseralimmi apriilip 27-ani takutinneqaqqaassaaq. Takutinneqannginneranilu ilinniartut suliartik saqqummiussavaat, takutinneqareerpallu isiginnaartut Nunatta siunissaa pillugu oqallissallutik.

Politikerillu arlallit Taseralimmi peqataaniarlutik nalunaareertut, Kaleeraq Møller Andersen oqarpoq.

Piviusulersaarullu illoqarfinnilu allani takutinneqarusuppoq.

- Aamma illoqarfinni allani takutinneqarnissaa neriuutigalugulu sulissutigaarput, piviusulersaarusioqataasoq, Kaaleeraq Møller Andersen taama oqarpoq.

Piviusulersaarummut pilerisaarut qulaani isiginnaarneqarsinnaavoq.