Sisimiuni erngup pitsaassusaa ulorianartorsiortinneqarpoq

Sisimiuni imeqarfiup ukiukkut angallavigineqartarnera Namminersornerullutik oqartussaasimasut Sisimiullu kommunerisimassaata immikkut akuersissuteqarnerisigut periarfissaavoq.

2007-mi Novemberiugaa qamussuit illiniliuutit Sisimiuni imeqarfimmut kivipput, ullullu marluk qaangiummata suli uuliakoorianngitsut qaqinneqapallallutik. Embedslæge Flemming Stenz naapertorlugu Sisimiut imeqarfiata mingutsinneqarnissaanut piffissaq kisimi apeqqutaaginnarpoq.

- Mingutsitsisoqariasaassagaluarpat neriuppunga sukkanerpaamik paasineqassasoq, salinneqarlunilu. Kisianni taamaattoqassagaluarpalluunniit illoqarfimmi mingutsitsiffiusumi aningaasartuutit imaannaassanngillat, allamillu imeqarfiliorallartariaqassaaq sivisuumik atuuttussamik, Flemming Stenz oqarpoq.

Namminersornerullutik oqartussaasimasut Sisimiullu kommunerisimassaata imeqarfiup sinaatigoortarsinnaanermut immikkut akuersissutaata imeqarfimmut qanoq kinguneqarnera toqqaannartumik oqaatigineqarsinnaanngilaq, erngup pitsaassusaanik misissuisarnerit nalunaarsorneqanngimmata.

Taamaattorli mingutsitsinerit imeqarfinniit ingalassimatittariaqartut.

Uumasut nakorsaat Namminersorlutik oqartussat ataani avatangiisinut pisortaqarfimmi atorfilik Reiku Sarvijoki oqarpoq.

- Mingutsitsinerit tamarluinnarmik imermut sunniuteqapiluttarput, taamaammat imeqarfiit sapinngisaq tamaat eqqiluitsuutinniarlugit qanillinissaannut killissarititanik maleruagassaqarpoq. Ajornanngippallu motorit uuliatortut, qimmit, inuillu imeqarfinnut ingalassimasariaqarput. Sisimiunilu pissutsit maannamut mingutsitsinermik kinguneqarnersut massakkuugallartoq oqaaseqarfigisinnaanngikkallarpakka, Reiku Sarvijoki oqarpoq.

Sisimiuni qamussuit illiniliuutit tallimat pigineqarput snescooterillu 600-t -800-llu missaanniissangatinneqarlutik.