Sisimiuni eqqumiitsuliat umiarsuarlu takornariartaat akuleriisippaat
Sølvinik pinnersaasiortut, pinnersaasiortartut, qalipaasartut allallu eqqumiitsuliortut Sisimiut katersugaasivianni saqqummersitsinermi ullumikkut ammarneqartussami peqataassapput. Eqqumiitsuliortut sisimiormiuummata tassani takutinniarneqarpoq ullutsinni Sisimiuni eqqumiitsuliortarneq.
- Katersugaasivinni saqqummersinneqarajuttarput itsarnissaat, uagulli aamma suliassaraarput ullutsinni pisut takutinnissaat. Taamaammat pingaartipparput eqqumiitsuliortut ataatsimoorlutik saqqummersitsinissamut periarfissinnissaat tassani takuneqarsinnaaniassammat illoqarfimmi eqqumiitsulioriaatsit assigiinngitsut pigineqartut, katersugaasivimmi pisortaq Ólafur Rafnar Ólafsson oqarpoq.
Kommunimi inuussutissarsiornermut siunnersuisoqatigiit aamma saqqummersitsineq nuannaarutigaat. Taamaasillunimi umiarsuarnut takornariartaatinut tikittussanut takutitassat soqutiginartut amerlisussaammata. Aamma illoqarfiup pisoqartaa oqaluffitoqqap eqqaa takutinneqarsinnaanngorpoq.
- Aalajangersimavugut eqqumiitsuliortortagut periarfissinniarlugit ataatsimoorlutik suliaminnik saqqummersitsinissaannut, taamaasilluta umiarsuarnut takornariartaatinut ilaasut piffissamik aningaasanillu Sisimiuni atuiniartut saaffigisinnaaniassagatsigit. Eqqumiitsuliortut tamarmik peqataanissamut periarfissaqarsimapput assullu qilanaaraarput illoqarfiup ilaani biilerfiunngitsumi ullutsinni eqqumiitsulioriaatsip takutinnissaa. Taamaasilluta uumassusilimmik niuffaffiuutigaluni kulturimik saqqumilaartitsineq pisinnaavoq illoqarfippullu umiarsuarnut takornariartaatinut aqqusaarfigissallugu pilerinarninngorlugu, Qeqqata kommuniani inuussutissarsiornermut siunnersuisooqatigiinniit Mads Pihl nalunaarpoq.
