Sisimiuni bussit killilimmik pilerisaaruteqarsinnaapput

Bussini pilerisaaruteqarsinnaaneq illoqarfinni anginerni killeqartinneqanngitsoq, Sisimiut kommuniat pilerisaarutinik killilersuivoq.

Ilulissani, Qaqortumi Nuummilu bussit killeqanngitsumik pilerisaarusersorneqarsinnaapput.

Nuup Bussiini ingerlatsinermik pisortap René Hansen-ip oqaatigaa, Nuummi bussit qanorsuaq pilerisaarusersorneqarsinnaasut, inunnut narrujuumminartuunngippata.

Sisimiunili taamaanngilaq. Kommunalbestyrelsip aalajangeqqammerpaa Sisimiuni bussit politikkikkut oqariartuutinik upperisanullu tunngasunik pilerisaaruteqassanngitsut.

Ilulissani, Qaqortumi Nuummilu pilerisaarutinut taamatut killilersuisoqanngilaq. Nuummili bussini aqqaneq marluusuni immiaaqqat pilerisaarutiginerat ukiut tallimat matuma siornagut unitsinneqarsimasoq, bussini ingerlatsinermut pisortaq René Hansen oqarpoq.

Peqatigiiffiit suliffeqarfiillu bussit atorlugit Nuummi ussassaariniarunik akikitsuinnaanngilaq. Assersuutigalugu bussip talerpiatungaani ussassaaruteqarniaraanni ukiumut 60.000 koruuninik akeqarpoq.

Sisimiuni borgmesteri Hermann Berthelsen oqaaseqartinniaraluaratsigu iluatsinngilarput