Sisimiuni biilit angallannermi ulorianartorpassuit

Sisimiuni politiit biilinik angallattunik ippassaq ullumilu misissuipput. Biilit 22-it misissorneqarnerini paasineqarpoq affai, aqqanillit, ima ajortigisut, allaat normuertariaqarlutik. Normuertariaqakkat amerlanersaat taxaapput.
Allattoq Najaaraq Egede
juunip 10-at 2010 13:41

Biilit aqqanillit taakku ima kukkuneqaqalutillu ajortigaat allaat angallannermi ulorianartorsiortitsisinnaasutut politiinit nalilerneqarlutik.

Biilit singarnersuarnik ulikkaarput, inngigissortaqarlutillu. Taamaakkaangat angallannermut inatsit malillugu aqqusinikkut angallannermi ulorianarluinnartutut isigineqartarput.

Biiliutillit, biilimik pitsanngorsarnissaannut ullunik 14-inik periarfissinneqarput, piffissallu taassuma iluani singarnerit ajoqutillu allat inatsisit malillugit aqqusinermi angallannermut ulorianartutut isigisassaajunnaarsillugit iluarsitissimappatigit piginnittut biilit normui tigoqqissinnaassavaat.

Misissukkat ilaat normuikkat inuata iluarsarneqarsimanerarlugit ullumi saaffiginnissutigimmagit, paasineqarpoq, biilit saviminertaasa sigginnerat nipittartorsuarmik tapemik qallerneqaannarsimasoq.

- Iluarsagassat asuli qalliinnarlugit pisat akuerisinnaanngilagut, taamaammat biilit normui tunniussinnaanngilagut. Sisimiuni politiit pisortaat Johan Davidsen oqarpoq.

Sisimiuni politiit sapinngisamik biilit aqqusinikkut angallannerannik siunissami nakkutilliisarniarput, kørekortillimmi biilernermut allagartartaannginnermini ilisimalereertarpaa, aqqusinermi angallannermi malittarisassaqartoq.

Politiit biilinik ingerlatsisunut eqqaasitsissutigiuarusuppaat piginnittup biilimi angallannermi isumannaatsuunissaanik akisussaaffeqarmat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq