Sisimiuni atuarfik annertuumik iluarsaatilerpaat

Minngortuunnguup atuarfiata Sisimiuniittup iluarsaanneqarnissaa erinitsaanneqarsimasoq 2011-imi aallartittussanngorpoq atuartorpaalussuillu atuarfiup aappaani Nalunnguarfiup atuarfiani atuartalerallassapput.

Iluarsaassinissamut atatillugu illussanik titartaasartunik unammisitsisoqarpoq. Angajoqqaat ilinniartitsisullu sanaartornermut ataatsimiititaliaq suleqatigalugu inassuteqartussanngorput siunissami atuarfiulersussamut titakkat sorliit tulluarnerunersut.

- Minngortuunnguup atuarfiata iluarsaannissaa 96 millioner koruuninik akeqassaaq aningaasartuutillu Qeqqata kommuneata Namminersorlutillu Oqartussat matussusertussaavaat, taama KNR-imut oqarpoq atuarfimmi siulersuisut siulittaasuat Jørgen Peter Labansen.

Minngortuunnguup atuarfia oqummit eqqugaanikuuvoq taassumalu saniatigut serlersaarisoqarneratigut imermit ajoquserneqangaatsiarnikuulluni.

- Iluarsaassinissamilli pisariaqartitsineq aatsaat pilinngilaq oqunnera serlersaarinerlu pissutigalugit, taama Jørgen Peter Labansen erseqqissaavoq.

- Iluarsaassinissamik pisariaqartitsineq ukiut qulit kingulliit atuutereerpoq. Namminersornerullutilli Oqartussani Namminersorlutillu Oqartussani tulleriiaarinerit pissutigalugit suliassaq kinguarsarneqarsimavoq, taama oqaatsini ilavai.

Minngortuunnguup atuarfia 450-it missaliorlugit atuartoqarpoq taakkunanngalu amerlasuut Nalunnguarfiup atuarfianut inissikkallarneqartussaapput atuarfiup iluarsanneqareerluni 2015-imi augustip qaammataani atulernissaata tungaanut.

- Ullumikkut atuarfiup illutaata ilarujussua isaterneqassaaq ilamerngali atuinnassaaq atuartullu ilai tassani atuartinneqassapput. Nalunnguarfiup atuarfiani init ilai allanngortiterneqassapput atuartut amerlinissaannut naleqqussarneqassallutik, taama Jørgen Peter Labansen oqarpoq.

Illussanik titartaasartut unammisinneqarneranni ajugaasut januarip pingajuani toqqarneqassapput.