Sisimiuni assigiinngitsunik pisoqarnissaa pillugu illoqarfik piareersarpoq
Sisimiuni ulluni makkunani ulapputtunnguaqarpoq.
Akunnittarfinni siniffiit qalilersorneqarput, sisoraatit perrassarneqassallutik qimmillu sukkaniunnissamut noqitassaajunnaarlutik piareersimallutik.
Sisimiuni pisussat annertuut pingasut qanittukkut pisussaapput; Arctic Circle Race, Avannaata Qimussersua aamma Arctic Sounds Festival.
Tamanna naliginnaasumit piareersagassaallunilu pilersaarusiorluagassaavoq.
Unnuiffissat tamakkerlugit inniminnerneqareerput
Pisussat pillugit ulapputtut ilaat tassaavoq, Sisimiuni Sømandshjemme.
Tassani init tamarluinnarmik qaammatip naaneranit inniminnerneqareerput. Tamannali ajorisassaanngivissoq, Sømandshjemmep aqutsisuata, Magnus Rejkjær Ellebyp oqaatigaa:
- Akunnittarfipput inoqarluartussaavoq. Piffissaq pisoqarfiusussaq tamakkivillugu ulikkaaqqassaagut, tamannalu ajunngilluinnarpoq, KNR-imut Magnus Rejkjær Elleby oqarpoq.
Pisussarpassuit ulapaarfiusussallu pillugit Qeqqata Kommuniani borgmesteri, Malik Berthelsen aamma qilanaarpoq:
- Pisussat illoqarfitsinnut annertuumik iluaqusiissapput. Naatsorsuutigisinnaavarpullu isiginnaariarpassuit tikerarumaartut, tamannalumi qilanaaraarput!
Tikeraat sumi najugaqassappat?
Sisoraatinik unammersuarnermut, Arctic Circle Racemut peqataasussat 150-init ikinnerunngillat aamma Arctic Sounds Festivalimi kingullermik peqataasut 800-t pallillugit amerlassuseqarput.
Akunnittarfinni peqataasussat inissaqanngippata taava sumi najugaqassappat?
- Ilaat namminneerlutik inissaqareerput, allat akunnittarfinniissapput allallu ilaqutariinni inissisimasuussallutik. Tassa tamakku periarfissaapput, Arctic Circle Racep siulersuisuini ilaasortaq, Johan Davidsen KNR-imut oqaluttuarpoq.
Sisimiormiut ikiuunnissaanik kajummissaarneqarput
Sisimiuni qimussertartut peqatigiiffianni, Qimusseq Sisimiuni siulittaasup, Susanne Berthelsenip Sisimiormiut pisinnaasut ikiuunnissaannik kaammattorpai:
- Periarfissatsialaavoq Sisimiormiut piumasut innisimasoqarsinnaaneri tassami qimussersartut piniartorsuillu illoqarfitsinnut tikittussaapput, tamannalu nammineerlunga assut qilanaaraara, Susanne Berthelsen KNR-imut oqarpoq.
Pisussanut assigiinngitsunut peqataasussat inissaqartinneqarnissaat pillugu ulapputtoqarnera, borgmesterip nuannaarutigaa:
- Akunnittarfinni Sømandshjemmemilu tikeraatta inissaqartinneqarnerisa saniatigut Sisimiormiut angajoqqaarsiaasinnaanerminnik neqerooruteqartut paasillugit nuannerpoq, borgmester Malik Berthelsen KNR-imut oqaarpoq.
Arctic Circle Race martsip 31-anni pisussaavoq. Avannaata Qimussersua aprilip aallaqqaataani pisussaalluni taavalu Arctic Sounds Festival aprilip arfernagannit quligat tikillugu pisussaalluni.