Sisimiuni arnanik saassussinerit marluk

Arnat marluk ajortumik pineqarsimasut - aappaa pinngitsaalillugu arneriffigineqarsimasoq, politiinut sapaatip-akunnerata naanerani nalunaarutigineqarput. Angutip aappaa tigummigallarneqarpoq aappaa iperarneqareersoq, Qeqqata politeeqarfiani pisortaq Johan Davidsen ilisimatitsivoq.
Allattoq Najaaraq Egede
juulip 04-at 2011 13:44

Arfininngormat ullaap tungaagut aqqanernut qiteqquttoq (juulip aappaani, aaqq.) arnaq 26-nik ukiulik politiinut kalerriivoq, angerlarsimaffimmini pinngitsaalineqarsimalluni.

Arnap angut 31-inik ukiulik ilisarisimavaa, taanaanerarlugulu pinngitsaaliivoq.

Angut kingusinnerusukkut tigusarineqarpoq pinngitsaaliillunilu arnerisimasutut pineqaatissinneqarnissaa siunertaralugu, ippassaq sapaammi killisiuisoqarmat suliap paasiniarneqarnerani angut ulluni 26-ni tigummigallarneqassasoq aalajangerneqarpoq.

Minutsit qulit kingorna
Suli arfininngornerusoq, nalunaaqutaq 10.40 arnaq 41-nik ukiulik politiinut nalunaarpoq aapparmi 38-inik ukiullip annersarsimagaani.

Angut 38-nik ukiulik savilisarsimavoq, taannalu arnap 41-nik ukiullip kilerfigaa. 38-nik ukiulik politiinit tigusarineqarpoq, kingornali iperagaalluni.

Angutip kingusinnerusukkut pineqaatissinneqarnissani  naatsorsuutigissagaa, politiit ilanngullugu ilisimatitsissutigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq