Sisimiuni aasaanerani nuannatsitsinermi najuuttorpassuit
Sisimiuni aasaanerani nuannatsitsineq ulluni marlunni ingerlanneqareersoq aallartilluaqaaq. Ullormi siullermi peqataasut 500-t sinneqartut kingusinnerusukkullu suli amerlanerulersut, Qeqqata Kommuniani pinaveersaartitsinermut siunnersorti, Arnaq Brøndlund ilisimatitsivoq.
Kommunimi pinaveersaartitsinermut siunnersortit, aningaasaliisut arlallit suleqatigalugit innuttaasut qassinilluunniit ukiullit imigassartaqanngitsumik nuannatsinneqarnissaannik aaqqissuussisuupput. Sisimiuni innuttaasut illuat ilaqutariinnut imigassartaqanngitsumik qaammammut ataasiarluni maannamut aaqqissuussiffiusaraluarpoq, tassanili inunnut 40-nut taamaallaat inissaqarluni.
- Ilaqutariit ataatsimoortillugit assigiinngitsunik sammisassaqartinneqarnissaat - aamma imigassartortunit killilersorneqanngitsumik aaqqissuussinissarput kissaatigigatsigu, Arnaq Brøndlund KNR-imut oqarpoq.
Taassuma erseqqissarpaa, nuannaffiup avataani inuit imigassartorniartut aaqqissuisuniit suneqarsinnaanngitsut, maannamulli inuit imigassartaqanngitsumik nuannisaqatigiinnissaasa tapersersorluarneqarnera malunnarluartoq.
Aaqqissuussineq ukiut tamaasa pisartussatut, aaqqissuisut aalajangiutereeraat, Arnaq Brøndlund ilisimatitsivoq.