Sisimiuni aalisartut umiarsualivimmik mattussinissartik kinguartikkallarpaat
Naalakkersuisut umiarsuarmik tunitsivimmik immikkut pilersitsinngippata, Sisimiuni aalisartut umiarsualivimmik mattussinissaminnik sapaatip akunnerani kingullermi sioorasaaripput. Tamannali maanna kinguartinneqarallartoq, Sisimiuni aalisartut sinnerlugit, Leif Fontaine taama KNR-imut oqarpoq.
- Umiarsualivimmik mattussinissatsinnik sioorasaarereertugullu, Inatsisartut aalisarneq pillugu ataatsimiititaliaata ullumi ataatsimiinnerminni, Naalakkersuisut piumaffigaat tunitsiveqarniarnerup politikkikkut piaartumik aaqqinneqarnissaa pillugu, taamaattumillu umiarsualivimmik mattussinissatsinnik isuma qimakkallarlutigu, Leif Fontaine oqarpoq.
Inatsisartut aalisarneq pillugu ataatsimiititaliaata siulittaasua, Nikolaj Jeremiassen (S), KNR-imut ullumi oqarpoq, ataatimiititaliap tamarmiusup Sisimiuni aalisartut isumaqatigalugit Naalakkersuisunut piumasaqaammik ataatsimiitialia,it maanna nassiussaqarlutik.
- Sisimiuni aalisartut umiarsuarmik tunitsiveqannginnerat qanorlu iliuuseqarniarnerat ataatsimiititaliap tamarmiusup taperserpaa. Ataatsimiititaliarlu aalajangerpoq tamanna pillugu Naalakkersuisunut allagaqarnissamik. Tassami Nunatsinni taamatut tunitsivissaaleqerusaartuarneq unammillerfiunngitsumillu tamassuma aaqqinneqarnissaa maanna pisariaqartutut isigisariaqalermat taama allagaqarpugut.
Aalisarneq pillugu ataatsimiititaliap siulittaasua, Nikolaj Jeremiassen oqarpoq.
Sisimiuni umiarsuarmik tunitsivimmik immikkut pilersitsisoqarnissaa, Sisimiuni aalisartunit kissaatigineqartoq, Naalakkersuisunit itigatinneqarpoq, nunami aalisakkerivinnut tunisisarnissamik piumasaqaat naapertorlugu oqarlutik tamanna nunami suliffissaqartitsiniarnermut iluaqutaammat, aalisartut piumasaqaataat malinneqarsinnaanngitsoq.
- Soorunami tunitsiveqarniarneq, unammilleqatigiissinnaaneq minnerunngitsumillu tunisat akiisa pitsaanerusinnaaneri sulissutigaagut, minnerunngitsumilli amerlanernik suliffissaqartitsiniarneq aamma sulissutigalutigu, Naalakkersuisut siulittaasuat, Kim Kielsen KNR-imut tallimanngormat taama oqarpoq.
Aalisarsinnaanermut akuersissutit tunniunneqarneranni piumasaqaataavoq, aalisartut nunamut tunisisarnissaat, taamaaliornermi aalisakkat qeritiinnarnagit nunanullu allanut nassiutiinnarnagit Nunatsinnili suliffissanik pilersitsioqarnissaa anguniagaalluni.
Naalakkersuisut qanoq maanna isummernissaat Sisimiuni aalisartut utaqqimaaqqaarniarlugu KNR-imut oqaatigaat. Naalakkersuisulli isumartik attatiinnassappassuk, umiarsualivimmik mattussinissaq suli eqqrsaataasoq, Sisimiuni aalisartut sinnerlugit, Leif Fontaine KNR-imut oqarpoq.
