Sisimiuni aalisartut umiarsualivimmik assersuinissamut piareeqqapput
Sisimiut eqqaannilu saarullinniarnermi pissutsit naammaginanngillat, Naalakkersuisullu umiarsuarmik tunitsiviusinnaasumik piaarnerpaamik akuersissuteqartariaqarput.
Sisimiuni Aalisartut Piniartullu Peqatigiiffiata, Aalisarnermut Naalakkersuisumut Karl-Kristian Krusemut ammasumik allagaqaateqarnerminni taama ilaatigut allaaserisaqarput, pissutsillu aaqqiivigineqanngippata akerliussutsiminnik takutitsiniarnertik umiarsualiviulluunniit assersorneqarnissaanik aamma pilersaaruteqarlutik:
- Saarulliit tulaanneqarsinnaasut taama annikitsigitillugit akiillu taama appasitsigitillugit, inuussutissarsiutaasinnaanera killilerujussuuvoq, tamannalu aalisartut inuussutigisinnaannginnamikku soorunami naammagittaalliuutigaat, Sisimiuni Aalisartut Piniartullu Peqatigiiffiata siulersuisuini ilaasortaq Leif Fontaine taama oqarpoq.
Aaqqissuussineq imminut akilersinnaanngitsoq
Aalisariutit annerit ulloq allortarlugu saarullinnik 2 tonsinik tulaassisinnaapput, umiatsiaararsortullu aamma ulloq allortarlugu 400 kiilunik tulaassisinnaallutik. Taamatulli aaqqissuussisoqarnera imminut akilersinnaanngitsoq SAPP-p oqaatigaa.
Umiarsuarmik tunitsiviusinnaasumik Naalakkersuisut akuersissuteqarnissaat piumasaraat, umiarsuarmi tunitsiviusinnaasoq Sisimiut umiarsualiviani talittarfimmi talinngavoq, akuersissummillu tunineqarnissaa utaqqiinnarneqarluni:
- Umiarsuup taassuma tunitsivittut atulernissaa Sisimiuni aalisartut kissaatigilluinnarpaat, taamaalilluni aalisartut ullut tamaasa tunisisinnaalernissartik, kiilunillu annertunerusunik aalisarsinnaanissartik tulaassorlugillu nunamut aammalu umiarsuarmut soqutigilluinnarpaat, taamaalillutik aningaasarsiornertik pitsaanerusumik inissittussaammat, Leif Fontaine oqarpoq.
Sisimiullu umiarsualiviata aalisartunit assersorneqarnissaa periarfissatut aamma isigineqarpoq:
- Aalisarumajunnaarnissartik siullermik oqariartuutigaat, pissutsilli imminut akilersinnaanngitsumik ingerlaannassappata taava assersuinissartik Sisimiuni aalisartut oqariartuutigaat, Sisimiuni Aalisartut Piniartullu Peqatigiiffianni siulersuisuni ilaasortaq Leif Fontaine oqarpoq.
