Sisimiuni aalisartut saattuartassinneqaqqikkusupput
Saattuat 500 tonsit Sisimiut eqqaani 2009-mut pisassiissutigineqarput, taakkulu aggustiuinnartoq nungummatigik, avataasiortut pisassaannik 300 tonsinik sinerissap qanittuani aalisartunut nuussivugut, taakkulu aalisarluaqigamik pisassat aamma tamakkereerpaat. Taama oqarpoq Aalisarnermut Naalakkersuisoq Ane Hansen.
Sisimiut eqqaani saattuarniarneq septembarip ulluisa 21-anni unitsinneqarpoq. Aalisartoq Marius Olsen oqaluttuarpoq, Sisimiut eqqaani saattuat nungusaataanngitsumik aalisarneqartut, tassami saattuaqarfiit arlaliusut ataatsikkut aalisarfigineqarneq ajormata, aammalu saattuat qaleruaasa aqiliulerneri apeqqutaatillugit qalluineq ingerlanneqartarmat. Marius Olsen aamma oqarpoq, saattuanik qalluinerup unitsinneqarnerata kingunerissagaa fabrikkimi sulisut 25-t angullugit suliffissaarutissammata, aalisartullu 50-it missaaniittut aningaasarsiorfeerullutik.
-Aalisartut nalornisorujussuupput, aatsammi ukioq naappat pisassinneqaqqittussaagamik. Taama oqarpoq Sisimiuni aalisartoq Marius Olsen.
Aalisarnermut Naalakkersuisoq Ane Hansen Radioaviisimut oqarpoq, Sisimiut eqqaani saattuarniartut allaffigisimallugit, erseqqissarlugu nungusaataanngitsumik saattuanik qalluisoqarnissaanut tunngavilersuutinik perusulluni, taamaattoqareerpallu pisasseeqqittoqarsinnaanera aatsaat eqqartorsinnaallugu.
- Pingaartippara aalisartut qanimut suleqatigalugit aaqqiinissaq, aamma pingaartippara aalisakkanik piujuaannartitsinissaq, aammalu naatsorsuutigalugu aalisartut aamma tamanna pingaartissagaa,. Aalisarnermut Naalakkersuisoq Ane Hansen oqarpoq.
KNAPK aamma Aalisarnermut Naalakkersuisoq Ane Hansen ualiartoq naapisimaarnerminni Sisimiut eqqaani saattuanik pisassiisoqaqqissinnaaneranik qinnuteqarsimaneq ilaatigut eqqartugaasa ilagaat.
