Sisimiormiut Taseralik atoqqaarfissiorluaqaat

Arfininngormat ammaanersiortoqarpoq, innuttaasullu ippassaq sapaammi takuniaasinnaasimapput, billitsillu isissutissat nungoraannavissimasut, kulturip illorsuata pisortaa, Juaaka Lyberth oqarpoq.

Illorsuaq kaffillerpoq assigiinngitsunillu aaqqissuussanik takutitsisoqarluni, tamanut aliikkutassiaq ”aaseralaat” takutinneqarpoq, meeqqanut inuusuttunullu tusarnaartitsineqarpoq, operamik tusarnaartitsisoqarpoq, erinarsortoqarpoq, eqqumiitsulianillu saqqummersitsisoqarluni, unnullu naggaserlugu filmertitsisoqarluni.

Atoqqaartitsilluni aaqqissuussinerit aqagu marlunngornermi ingerlaqqissapput, meeqqerivinniittartunut tusarnaartitsinernik, utoqqalinersiutilinnut filmertitsinermik, eqqumiitsuliortorlu Miki Jakobsen suliaminik soqutiginnittunut unnukkut oqaluttuassaaq.

Don Maliko, KNR-awardimi ajugaasoq, pingasunngorpat raperluni tusarnaartitsissaaq, tusarnaartitsinissamilu billitsit nungunneqakatareermata Don Maliko-p immikkut tusarnaartitsinissaa Taseraliup maanna sulissutigigaa, Juaaka Lyberth ilisimatitsivoq.