Sisimiormiut eqqagaat asiusinnaasut naggorissaatitut atorluarnianeqalerput
![Sisimiut](/sites/default/files/styles/image_934x467/public/article_images/legepladsen_ved_spejdersoeen_i_sisimiut.jpg?itok=x6MrlTKW)
Sisimiuni eqqakkat amerliartortillugit illoqarfiup ikuallaavia angumattuuveqqasalerpoq taamaalilluni eqqakkat uninngatiinnarneqartartut amerliartuinnavillutik.
Tamanna qaangerniarlugu Qeqqata Kommuniata Namminersorlutik Oqartussat aamma suliffeqarfik Rambøll suleqatigalugit, eqqakkat asiusinnaasut naggorissaatigineqarsinnaanngorlugit issunngortinnialerpaat.
Taamaaliornissamut containerit qerititsivittut atorneqartartuusimasut, Royal Arctic Linemillu atorneeerussimasut pisiarineqarput. Taakkulu iluisa igaat qisunnik qallersorneqarput kissartumillu supoorummik pilersorneqarlutik.
- Eqqakkat asiusinnaasut naggorissaatinngortinneqarnissaat siunertaralugu, silaannaaq kissartoq 30 gradenik kissassuseqartoq containerit iluinut supoortinneqartassaaq, taamaalioreernermilu silaannaq nammineerluni kissakkiartussaaq 70 gradit angussallugit. Taamaalippat eqqakkat allanngoriartussapput naggataatigullu naggorissaatigineqarsinnaalerlutik, eqqakkat aamma naggorissaatit pillugit ilisimatooq, suliniummullu tamatumunnga akisussaasuusoq, Rasmus Eisted atuagaassiamut Inginiørenimut oqarpoq.
Sisimiuni suliffeqarfiit eqqagaat asiusinnaasut aallartisaanermi atoqqaarneqassapput, kingusinnerusukkulli Sisimiuni inoqutigiit 400-it peqataatinneqalissallutik. Inoqutigiit eqqaariaatsinik allannguisussaassapput tassami taakku eqqakkaminnik immikkoortiterineq sungiuttussaassammassuk.
Suliniummut tamassumunnga Avatangiisit amma Pinngortitaq pillugu Naalakkersuisoqarfik tapiissuteqarpoq.