Sisimiormiut avatangiisitik qajassuuppaat

Qaammatini marlunni illoqarfimmi pisiniarfiit silataanni inissiaqarfiillu eqqaanni containerit inissisimareerlutik siullermeerutaasumik maanna imaarneqarput. Tassanilu paasinarsivoq eqqaaviliineq illoqarfimmiut qujarulluarsimagaat.

- Atuilluartuunissaq ulluni pingasuni Sisimiuni isumasioqatigiissutaareerpoq. Tassanilu eqqartorneqartut ilagaat akisussaassuseqartumi iliorneq atuilluartuunissamut attuumassuteqarluinnartoq. Containerit eqqaaviit sisamat ulikkaartut takutippaat Sisimiuni innuttaasut amerlasuut piareersimasut avatangiisit paarilluarnissaannut. Taanna eqqarsariaaseq isumasioqatigiinnerup nalaani aamma maluginiarpara. Taamaammat Teknikkimut Avatangiisinullu ataatsimiititaliami siulittaasutut tamanna naammagisimaarluarpara, Hans Frederik Olsen oqarpoq.

Containerinik atorluaasut amerlagaluartut suli inoqarpoq taakku sumut atornissaannik paasinnissimanngitsunik. Containerit eqqakkanik puiaasaanngitsunik qillertuusaanngitsunillu immerneqartarsimapput, tamannalu eqqakkanik immikkoortiterisarnermut akornutaasinnaavoq.

Taamaammat aalajangiunneqarpoq containerit puiaasanut qillertuusanullu atugassiat pitsaanerusumik atorneqarnissaat siunertaralugu paasititsiniaasoqassasoq. Kommuni inissiaateqarfillu ukiap ingerlanerani atuarfeqarfiit attaviginiarpaat meeqqanut paasititsiniaanissaq siunertaralugu. Taamaasilluni siunissami atuisussat paasinnilluarnissaat qulakkeerniarneqarpoq taakkulu nassuiaanneqassapput eqqakkat immikkoortiternissaat atoqqiisarnerlu qanoq pingaaruteqartigisut.