Sisimiormiu nersornaatisisoq
"Pinngortitaq Avatangiiserlu igitaqarfiunngitsoq" qulequtsiullugu nersornaat Jacob Herholdt Frobergimut, Sisimiormiumut ippassaq tunniunneqarpoq. Taanna kulturikkut illorsuarmi Taseralimmi ilasseqatigiittoqarnerani 10.000 koruuninik aningaasartalimmik nersornaatisivoq.
Jacob Herholdt Frobergip nersornaaserneqarnera, Naalakkersuisunut ilaasortamit Agathe Fontainimit ima tunngavilersorneqarpoq.
- Qaqqat sivingarnini, aqqusinerni assigisaanilu pinngortitamut igitanik katersisarputit. Kisimiillutit paninnguilluunniit ilagalugu paaqqinnittarfimmit allamilluunniit ingerlaartillutit puussiamik katersiffissannik nassataqartuaannarputit. 2009-mi aasakkut maligassiuilluarlutit, kiilut hunnorujut arlallit katersorsimavatit. Ullut tamaasa aqqutit allanngortilaartarlugu igitanik katersisarputit. Imminissarsiornak iliuutsikkut takutippat tamatta avatangiisimik pitsaanerusumik kusanarnerusumillu avatangiiseqarnissatsinnik iliuuseqaqataasinnaasugut, Agathe Fontain oqarpoq.
Savaatillit Kujataamiut Andala Lund aamma Siiku Motzfeldt qanittukkut "Nukik piujuaannartoq" pillugu nersornaaserneqarput. Taakku erngup nukissiorfiliorfeeqqamik pilersitsisimanerat pillugu nersornaaserneqarput. Soorluttaaq siornatigut EU-Parlamentimut ilaasortaasimasoq Finn Lynge aamma "Earth Charter Narsaq" avatangiisip piujuaannarnissaanut soqutiginnilersitsinerat pillugu qanittukkut nersorniarneqarput.
