Sisamat parnaarussaapput

Inuit sisamat, Danmarkip Islandillu akornanni ikiaroornartumik anngiortumik marloriarlutik timmisartukkut eqqussisarsimasut, parnaarussaapput.

Islandimi nittartakkami, tuluttuinnaq saqqummersartumi, Iceland Reviewimi, ullumi taama allaaserinnittoqarpoq.

Københavnimi Politiit, Iceland Review naapertorlugu, Keflavíkimi Timmisartoqarfik oktobarip qiteqqunnerata nalaani attavigisimavaat, qinnuigalugu, islandimiut aappariit, Kastrupimi Timmisartoqarfimmiit Islandiliarlutik aallaqqammersut, tikippata tigusareqqullugit. Aanngajaarniutit amfetaminit islandimiut taakku pooqattaanni Københavnimi Politiit nassaarisimavaat.

Angutit allat marluk, 20-t sinnilaarlugit ukiullit, islandimiut politiivisa oktoberip qaammataani kingusinnerusukkut aamma tigusaraat, hashimik 10 kiilumik Danmarkimiit Islandimut anngiortumik eqqusseqataasimasutut taakku aamma pasineqarput.

Iceland Rewiew naapertorlugu, Islandimi Politiit nakkutilliisut Københavnimilu Politiit ikiaroornartunik aanngajaarniutinillu anngiortumik eqqussuissarnermi misissuinerni qanimut suleqatigiilluarput.