Sisamanngornermi aamma imarpik qulaallugu timmisartuussisoqassaaq
Air Greenlandip timmisartorsuaq sisamanngorneq maajip 26-iat Københavnip Kangerlussuullu akornanni timmisartuusseqqissaaq. Timmisartoqqusinnginnerli pissutigalugu Air Greenlandip Dash 7-ii marluk suli Ilulissani uninngapput.
Air Greenlandimut ilaallutik Danmarkiliarniat Kangerlussuarmiit kujasinnerusumi angalasussat pilersaarutit malillugit aqagu sisamanngornermi pisattaminnik tunniussiartussapput timmisartorsuaq Norsaq pilersaarutit malillugit timmisartuussissammat.
- Avannaaliartussallu Air Greenlandimit sms, e-mail oqarasuaalluunniit atorlugu attavigineqassapput, timmisartuussinerillu ingerlaqqilerpata inissanut siullernut ilaatinneqassapput. Ilaasussat nutaamik aallarfissaminnik attavigineqareersut, nittartakkatsigarput atorlugu malinnaaqquagut avannaani timmisartortoqarsinnaaleriarpat Air Greenlandip ilaasut piaarnerpaamik apuunniassavai, Air Greenland taama nalunaarpoq.
- Angalasut Danmarkimeersut ataasinngornermi marlunngornermilu eqqugaasut angalanissamut pilersaarutaat nutaaq pillugu Air Greenlandimiit attavigineqassapput. Taamaammat ilaasussat Air Greenlandimut saaffiginninnatik nittartakkakkut malinnaaqquneqarput. Tuniniaanermut immikkoortortamiit ilaasut pineqartut attavigineqassapput, Air Greenland nalunaarpoq.
Pingasunngornermi Islandimut timmisartuussinerit aamma ingerlanneqarput.
Avannaani timmisartoqqusiunnaarnerup kinguneranik avannaani angalasut pingasunngornerup ualinerani 106-it eqqorneqarsimapput kiisalu Kangerlussuup Københavnillu akornanni ataasinngornermi pingasunngornermilu taamaatitsinerit pissutigalugit ilaasut 309-it eqqorneqarsimallutik.
