Sisamanik ukiulik qungatsimigut kiitittoq
Meeraq Ilulissani qimuttumit ippassaq kiitissimasoq ullumi Radioaviisimi oqaluttuaraarput.
Politiillu paasissutissanik amerlanerusunik maanna tunniussisinnaalerput.
Niviarsiaraq svenskeq sisamanik ukiulik qimuttut pitoqqasut akornannut pillunilu pangallammat qimuttunit kiineqarpoq.
Taama pisoqartillugu, soorlu qimuttunit kiitittoqartillugu, Ilulissani Politeeqarfimmi pisortap, Karl Wintherip, oqarnera naapertorlugu, niviarsiaraq qungatsimigut itingaatsiartumik kiitissimavoq, qujanartumilli annerusumik ulorianartorsiorani.
Niviarsiaraq sisamanik ukiulik, angajoqqaanilu takornariarlutik Ilulissaniissimapput, napparsimmavimmilu maanna uninngavoq, inuunera ulorianartorsiorani, Danmarkimulli Sverigemulluunniit suliaritikkiartorluni aallartariaqassaaq.
Uuma pisup kingumut eqqaasitsissutigaa angajoqqaat meeqqatik nassuiaalluartassagaat qimuttut illumiutaanatik qaasuttuummata. Aamma meeqqat qimuttut eqqaanniikkaangata angajoqqaat nakkutigilluaqqissaartariaqarpaat, Karl Winther erseqqissaavoq.
Taanna aamma oqarpoq, niviarsiaraq sisamanik ukiulik angummit periataallaqqissumit takuneqarallartilluni annerusumik ajoqusinngitsoq, angutillu nammineq inuunera aamma ulorianartorsiorsimasoq.
