SISA isertitaqarluarpoq

Sulinermik Inuussutissarsiuteqartut Soraarnerussutissiaqalernissamut Aningaasaateqarfimminnut SISA-mut siorna 2004-imi toqqortaat 85 mio. koruuninik ilapput, taakkunanngalu erniortitat 33,5 mio. koruuniusimallutik. SISA-ip taama iluanaaruteqarnera SIK-p siulittaasuata Jess. G. Berthelsen-ip ima nassuaateqartipaa:

- Isertitat SIK-mut immikkut sunniuteqassanngillat, ilaasortaasulli soraarnerussutisiassaasa ukioq manna 4 procentimik ernialiiffigisinnaanissaannik kinguneqarumaartut neriuutigaarput.

SISA soraarnerussutisiassanik erniortitsinermini 9,5 procentimik angusaqarpoq, Danmarkimi soraarnerussutisiaqarnissamik aningaasaateqarfiit 60-it misaanniittut akornanni SISA angusaqarluartut sisamaattut inissilluni. Tamanna aningaasat qanoq erniaqartinneqarnissaat pillugu SISA-p Grønlandbankimut Alfred Berg-imullu isumaqatigiissuteqarsimaneranik ilaatigut peqquteqartoq Jess G. Berthelsen oqarpoq.

SIK-mi ilaasortat aamma amerliartorput, tamannalu SISA-mut akiiliumanngitsunik allafiginnilluni akiliisitsiniartalernermik aamma peqquteqartoq SIK-ip siulittaasua oqarpoq.

SISA-p ukiuni kingullerni tallimani aningaasanik erniortitsinermini katillugit 80 mio. koruunit isertissimavai. SISA-mut 27.000-it missaat ullumikkut ilaasortaapput. 17.000-it missaat qaammatit tamaasa ilaasortaanermut akiliisarlutik.