SIS siulittaasortaarpoq

Siumup inuusuttaasa suliniaqatigiiffiat Sisimiuni ataatsimeereerlutik, siulersuisuunerni ilaasortaatitat arfineq-marluusut tamakkingajallutik taarserneqarput.

SIS-i Nuna tamakkerlugu ataatsimiisitsinerani ilaasortat taasisinnaasut 12-it peqataapput.

Siumup inuusuttortaani silittaasuusimasoq Doris Jakobsen, SIS-ip Siumumi aaqqissuussaanermut siulittaasussatut qineqqusaarniarnini pissutigalugu Siulittaasutut qinigassanngorteqqinniarani nalunaarnikuuvoq.

Maanna siulittaasunngorpoq 29-nik ukiulik Tom Nykjær Schmidt. Tom-i Nuup kommuneani overassistentitut atorfeqarpoq, Nuummilu immikkoortortaqarfimmi ilaasortaalluni.

Nuna tamakkerlugu SIS-ip immikkoortortaqarfii katillugit quliusut, Tom Nykjær Schmidt-ip oqaatigaa, nangillunilu oqarpoq siunissami Siumumi inuusuttut immikkoortortaqarfii amerlanerulernissaat SIS-mit anguniarneqassasoq.

SIS-ip siulersuisortaavi siulittaasussaq sorleq tapersersussaneritsik aqagu paasinarsissasoq oqaatigaat.