SIS: Qinersisinnaanermut inatsit ullutsinnut naleqqussarneqarli
Qinigassanngorteqqusaananilu qinerseqqusaanngitsup Sisimiuneersup Malik Berthelsenip Siumut sinnerlugu qinigassanngortissimasup oqallisigineqarneranut Siumut Inuusuttut Suliniaqatigiiffiat maanna akuliuppoq. Qinersinernut atatillugu inuusuttut nunanut allanut pikkorissariarlutik ilinniariarlutilluunnit aallartartut qinersisinnaatitaanermut maleruagassani ilanngullugit killiliivigineqartarnerat allanngortittariaqartoq, SIS-imi siulersuisuni ilaasortaq Britta Nielsen Johansen isumaqarpoq:
- Allanngortittariaqarpoq pissutigalugu, taanna inatsit nunaqavissuunngitsut eqqarsaatigalugit suliarineqarsimammat kikkulluunnit tikiinnavillutik qinigassanngortissinnaannginnissaat anguniarlugu. Malik Berthelsenilli qaammatit marluk ilinniariartorsimanini pillugit qinigassanngortissinnaajunnaarsinneqarnera ingasappallaaqaaq, taamaattumik nunaqavissunut tunngasunik nutaanik piumasaqaasiortoqartariaqarpoq. Aamma inuusuttorpassuit ilinniariarlutik aallartarput, taamaattumik inatsit ullutsinnut naleqqussartariaqarpoq. Britta Nielsen Johansen nassuiaavoq.
Pineqartoq Malik Berthelsen Danmarkimut qaammatini marlunni pikkorissarsimavoq, qinersisinnaatitaanermullu kiisalu qinigaasinnaanermut inatsit qaammatini arfinilinni nunatsinniittussaatitaanermut tunngasoq sapaatip-akunneranik inorsimammagu Namminersornerullutik Oqartussani Qinersinermut Ataatsimiititaliap tunuartippaa.
Nunanut allanut ilinniariartut pikkorissariartortartullu pillugit immikkut inatsisiliortoqartariaqartoq Britta Nielsen Johansen aamma isumaqarpoq:
- Nunaqavissut politikkimut kikkulluunnit soqutiginnittut nunaqavissut kaammattortuartillugit, soorlu aamma inuusuttut ilinniarnissamik kaammattorneqartartut inatsisit taama iluseqarnerat pissutigalugu eqqorneqartassappata akueriuminaatsipparput. Britta Nielsen Johansen oqarpoq.
Malik Berthelsen Århusimi Kalaallit Illuutaani siunnersorneqarsimavoq Danmarkimi akeqanngitsumik nakorsiarsinnaanissani qulakkiissaguniuk Århusimi inuit allattorsimaffiannut allatsikkuni pitsaanerussasoq. Namminersornerullutik Oqartussat nittartagaani inassutigineqarpoq, qaammatit arfinillit sinnerlugit nunarput qimallugu ilinniariartorniaraanni pinngitsoornani tikitami inuit allattorsimaffiannut allatsittoqartassasoq.
