SIS peqqusiileqisoq

-Taamatut inissinneq peqqusiileqinarpoq.

Taama qisuariarput Siumup inuusuttai, naalakkersuisunut ilaasortaasimasup Jens Napaattuup 400.000 kruunit sinnerlugit ilassinninnermut aningaasartuuteqarsimanera saqqummiunneqareersorlu. Aningaasat taakku ilaatigut nerersuarnernut akisuunut, Københavnimi atisaajarluni qitittarfimmi pulaarnermut ilaqutariillu nereqatigiinnerinut atorneqartarsimapput.

-Qularutissaanngitsumik Jens Napaattooq killissani qaangerlugit iliorsimavoq, tunuarneralu pissusissamisuuginnarpoq, taama nalunaarpoq Siumup Inuusuttaasa siulittaasuat Mads Petersen.

Taassumali isumaa naapertorlugu Namminersornerullutik Oqartussani ilassinninnermut aningaasartuutaasartut eqqarsaatigalugit malittarisassanik sukaterisoqartariaqanngilaq.

-Malittarisassat erseqqipput, ilassinnittoqartartussaavoq immikkut pissutissaqartillugu. Aamma ilassisassat Namminersornerullutik Oqartussat avataaneersuuppata. Ajornartorsiutaasimavorli malittarisassanik malinninnissaq, Mads Petersen oqarpoq.

Siumup inuusuttai matumani nereqatigiinninnernut peqataasarsimapput.

-Tamanna imminermini ajunngikkaluarpoq malittarisassat unioqqutinneqarsimanngitsuuppata, SIS-ip siulittaasua taama oqarpoq.