SIS: Maleruagassanik malinnissinnaanngitsut tunuarlik

Inatsisartut ilaasortaqatiminnik taasissussisarsimanerannik misissuisitsinerup kingorna kinguneqartitsisoqannginnissaanik inatsisartut siulittaasoqarfiata tallimanngormat ataatsimeereerluni aalajangernera, Siumup inuusuttaasa sakkortuumik uparuarpaat.
Allattoq Najaaraq Egede
decembarip 22-at 2008 06:30

- Inerniliussaq tusarlugu assorsuaq pakatsinarpoq, ima isikkoqalerami Inuiaat kiffaangissuseqarlutik taasarisimasaat kiffaanngissuserlu atorlugu sulisitaat taama ajornanngitsigisumik maleruagassat sanioqqussinnaassappatigit demokratii sumiissava? SIS-ip Siumut inuusuttaasa siulittaasuat Benjamin Kielsen oqarpoq.

Taamaattumik inatsisartut maleruagassaat "assiliatut assitaqarani nivingasutut" – tassa atortinneqarsinnaanatik atortinneqartutut - nalilerpai.

- Inatsisartut siulittaasoqarfiata suliamut uunga suliaqarnera aamma naammaginartutut nalilinngilarput, peqquserlunnernut "akuersaaginnartutut" inissimmat, Benjamin Kielsen oqarpoq, nangillunilu.

- Inuiannut paaseqqoqaarput politikkerertaminnut maleruagassanik malinnissinnaangitsunut maleruutiinnassanngimmata. Taamaammat inatsisartut maleruagassaminnik malinnissinnaanngitsut kaammattorumavagut Inatsisartuniit tunuaqqullugit. Inatsisartoqarnerup ataqqinassusaa innarlissanngikkunikku tunuartariaqarput, Benjamin Kielsen naggasiivoq.